एमालेले वास्तविकता बुझाउन वडा तहसम्मै थाल्यो  तयारी

झापा, २७ साउन । नेकपा एमाले र सरकारविरुद्ध छरिएका भ्रमका बारेमा वास्तविकता बुझाउन वडा तहसम्मै अभियानकाे तयारी गरिएको छ ।

साे अभियानकाे वडा तहसम्मै सञ्चालनको तयारी गरिरहेको बेला एमाले बाह्रदशीले मंगलबार ज्येष्ठ नागरिककाे भवनमा नेता, कार्यकर्ताबीच घनिभूत रूपमा छलफल गरेको छ ।

पछिल्लो समय नेकपा एमाले र सरकारविरुद्ध योजनावद्ध रुपमा भ्रमकाे खेती गरिएपछि अगुवा नेता तथा कार्यकर्ताहरुलाई साे विषयमा यथार्थ जानकारी दिने उद्देश्यले अन्तरक्रिया आयोजना गरिएको एमाले बाह्रदशी गाउँपालिका कमिटीका अध्यक्ष अनिल सापकोटाले बताए ।

अगुवा कार्यकर्ताहरु सहभागी अन्तरक्रियामा पाँच वटा समूह बनाएर  पार्टी र सरकारविरुद्ध उठेका विषय वस्तुहरुलाई  सरल र सहज ढंगले बुझाउने गरि सवालजवाफ गरिएको उनले बताए । कार्यकर्ताहरुले  पार्टी र सरकारमाथिको आरोपलाई जिज्ञासाका रुपमा राखेका थिए ।

रवि लामिछानेमाथि सरकारले प्रतिशोध साँधेको, गिरीबन्धु काण्ड, कम्बोडिया काण्ड, भिजिट भिजा, भ्रष्टाचार, पूर्व राष्ट्रपति विद्यादेवि भण्डारी, पार्टीभित्रको अन्तरविरोध लगायतका विषयमा भ्रम फैलाइरहेकोले यसमा सचेत भएर नेता, कार्यकर्ताहरु प्रष्ट हुन आवश्यक रहेकाे अन्तरक्रियामा बताइएकाे एमाले झापा सचिव तुलसी कार्कीले बताए ।

कार्यकर्ताहरुको जिज्ञासालाई  एमालेका केन्द्रीय सदस्य एवम्  झापा इञ्चार्ज रोमनाथ ओली, केन्द्रीय सदस्य हरि बहादुर राजवंशी, जिल्ला उपाध्यक्ष शिव ढुंगेल लगायतका नेताहरूले प्रष्ट पारेका थिए ।

एमाले गाउँपालिका कमिटीका अध्यक्ष अनिल सापकोटाकाे अध्यक्षतामा सम्पन्न एकदिने अन्तरक्रिया कार्यक्रमकाे स्वागत उपाध्यक्ष यादव मिश्रले र सञ्चालन उपसचिब रविना ढकाल गरेकी थिइन् । अन्तरक्रिया कार्यक्रमको सहजीकरण पार्टीका झापा  अध्यक्ष प्रेम गिरीले गरेका थिए ।