चारआलीको शवदाहस्थल बिर्तामोडको डम्पिङ साइट

चारआली, ३ भदौ । मेचीनगर–१३, देउनीया स्थित शवदाह स्थलमा बिर्तामोड नगरपालिकाले फोहोर मैलाको डम्पिङ साइट बनाएपछि मेचीनगरका सरोकारवालाहरुले आपत्ति जनाएका छन् ।

मेचीनगर–१३ को भूगोलमा रहेको हरियाली सामुदायिक वन उपभोक्ता समितिको क्षेत्रभित्र रहेको शवदाह स्थलमा बिर्तामोडको जेसीवीले खाल्डो खनेर फोहोर मैला फ्याक्ने गरेको छ ।

चारआली, शहरेडाँगी, दुहागढी, बिर्तामोड–६, बुट्टाबारी लगायतको क्षेत्रबाट सदीयौँदेखि मान्छेको मृत्यु भएमा दाहसंस्कारका लागि उक्त शवदाह स्थलमा ल्याउने गरिएको छ । स्थानीय बद्री महतले मान्छेको मृत्यु भएपछि पवित्रस्थलको रुपमा लाने ठाँउ शवदाह स्थलमा फोहोर ल्याएर फ्याक्नु ठिक नभएको बताए ।

देउनीया खोला र शवदाहस्थल नै पुर्ने गरी जेसीवीले खाल्डो खनेर फोहोर थुपारेपछि १३ नम्बर वडाका वडाध्यक्ष कृष्णराज सिग्देल, मेची शव डिभिजन कार्यालयका प्रमुख वन अधिकृत सुरज निरौला, हरियाली सामुदायिक वनका अध्यक्ष जगतकुमार तामाङ लगायत स्थानीयहरुले त्यसको विरोध गरेका छन् ।

वन अधिकृत निरौलाले वातावरण परीक्षण, आईई, एआई नगरी तथा सामुदायिक वन, शव डिभिजन कार्यालय र वडा कार्यालयलाई समेत जानकारी नदिई फोहोर मैला फ्याकेकोले कारवाही प्रक्रिया अघि बढाउने बताए ।

वनका अध्यक्ष तामाङले राति कतिखेर आएर फोहोर फाल्यो थाहा नभएको बताए । अब यसलाई सम्बन्धीत ठाउँमा जानकारी गराएर रोक्ने उनको भनाई छ । शवदाहस्थल बिर्तामोड–६ र मेचीनगर–१३ को सीमानामा पर्छ ।

‘वर्षौदेखि गरिव जनता मृत्यु भएमा यहाँ शवदाहस्थल ल्याउने गरिएको छ’, वडाध्यक्ष सिग्देलले भने–‘धनिमानीहरुले दाहसंस्कार गर्न माई लान्छन् । तर, अधिकांश जनताको दाहसंस्कार गर्ने ठाउँ नै पुरिएपछि समस्या भयो । खोलाको जग्गा समेत अतिक्रमित भएको छ । तत्काल फोहोर फाल्ने काम बन्द गर्नु पर्छ ।’

रोचक भूगोल

यो भूगोलको इतिहास भने रोचक रहेको छ । वडा नम्बर १३ मा रहेको हरियाली सामुदायिक वन उपभोक्ता समितिका साढे ४ सय उपभोक्ताहरु बिर्तामोड–६ का छन् । यसको कार्यालय बुट्टाबारीमा छ ।

१४९ हेक्टर क्षेत्रफलमा रहेको सामुदायिक वन परिसरमा हरियाली सीमसार धार्मिक पर्या पर्यटन, पोखरी, सभाहल, किराँत र लिम्बुको मन्दिर, तामाङको मलामी घर लगायतको संरचना रहेको छ । ति सबै संरचना निर्माणका लागि बिर्तामोड नगरपालिकाले बजेट दिएको थियो ।

बिर्तामोड, अर्जुनधारा, चन्द्रगढी र मेचीनगरको सीमामा रहेका सामुदायिक वनहरु प्रगति, हातेमालो, हरियालीको भूगोल विचित्रको रहेको छ । अर्को गज्जवको कुरा १३ नम्बर वडामा रहेको सीमसार क्षेत्रको बोर्डमा बिर्तामोड–६ लेखिएको छ ।