सहकारीका सदस्यलाई उद्यमशीलतामा लगाउनु पर्छ : महेन्द्र गिरी

मेचीनगर, २१ भदाै । राष्ट्रिय सहकारी बैंक लिमिटेडका अध्यक्ष महेन्द्र गिरीले सहकारीहरूले अब सदस्यहरूलाई उद्यमशीलतामा लगाउनु पर्ने बताएका छन् ।

शनिबार धुलाबारी स्थित मेची उद्योग बाणिज्य संघको सभा हलमा सम्पन्न पूर्वीद्वार बचत तथा ऋण सहकारी संस्थाको १९ औँ माईन्यूट प्रमाणित बार्षिक साधारण सभामा प्रमुख अतिथि गिरीले यस्तो बताएका हुन् ।

नेपालकै पहिलाे उत्कृष्ट सहकारी सहारा नेपालका प्रमुख कार्यकारी अधिकृत समेत रहेका प्रमुख अतिथि गिरीले सहकारीमा धेरै चुनाैतिहरू रहेकाे बताए ।

उनका अनुसार देशभरिका ५ सय वटा सहकारी समस्यामा छन् । त्यसमध्ये करिव ४२ वटा सहकारी समस्याग्रस्त अवस्थामा रहेकाे छ । झापामा पनि करिव १० वटा सहकारी समस्यामा छन् ।

´अन्य बैंकसँग प्रतिस्पर्धा गर्न सकिदैन`, गिरीले भने-´सहकारीले एकजनालाई २५ लाख भन्दा बढी ऋण लगानी गर्नु हुँदैन । स-साना बचतलाई ध्यान दिनु पर्छ । आफ्नो व्यालेन्स अनुसारकाे ऋण लगानी गरे उत्तम हुन्छ ।

गिरीले केही वर्षअघि देखि घाटामा गएकाे राष्ट्रिय सहकारी बैंकलाई अहिले नाफामा ल्याउन सफल भएकाे बताए । यसलाई अझ राम्राे बनाउन २ वर्ष लाग्ने उनकाे भनाई छ ।

कार्यक्रममा जिल्ला सहकारी संघ झापाका वरिष्ठ उपाध्यक्ष दुर्गाप्रसाद सापकोटाले सहकारीभित्र बसेर  राजनीति गर्न नहुने बताए । उनका अनुसार सहकारी सामाजिक पाेपर्टी भएकाले लहडमा लागेर सहकारी चलाउनु हुँदैन । मेचीनगर नगरपालिकाका सहकारी समन्वय समिति सदस्य समेत रहेका सापकोटाले नगरमा ३४ वटा सहकारी अनुगमन गर्दा पूर्वीद्वार साकाेस उत्कृष्ट रहेकाे पाइयाे ।

कार्यक्रममा सञ्चालक समिति सदस्य निरज कट्टेलले संस्था स्थापना गर्दादेखि भाेगेका समस्या लगायतका विषयमा चर्चा गरेका  थिए ।

सोही अवसरमा संस्थाले नियमित बचततर्फ ज्यामिरगढीका उत्कृष्ट शेयर सदस्य राजुशील शर्मा, खुटिडाँगीकी नारायणी बास्ताेला, बाल बचततर्फ धाइजनकी श्रीयान्सी गिरी र काँकरभिट्टाका आर्यमान पाैडेल, नियमित ऋणतर्फ ज्यामिरगढीका उत्कृष्ट शेयर सदस्य दयामुनी पाहान र नरेश भण्डारी, ज्येष्ठ नागरिकतर्फ ज्यामिरगढीका उत्कृष्ट शेयर सदस्य शेरबहादुर लिम्बु र भृकुटीकि टंकमाया कार्की, सफल व्यवसायी वा उद्यमीतर्फ ज्यामिरगढीका उत्कृष्ट शेयर सदस्य सञ्जय राजबंशी, संरक्षित पुँजी फिर्ता कोष वितरणतर्फ ईटाभट्टा तर्फकी पार्वती कार्की खड्कालाई नगदसहित सम्मान गरेको छ ।

त्यस्तै संस्थाले उत्कृष्ट कर्मचारीतर्फ भृकुटी सेवा कार्यालयकी कनिष्ठ सहायक तृतिय सन्तकला माझीलाई पनि सम्मान गरेको छ । त्यस्तै उत्कृष्ट सेवा कार्यालयतर्फ ज्यामिरगढी सेवा कार्यालयलाई पनि सम्मान गरिएको छ ।

२०६३ असार ७ गते स्थापना भई ३३ जना शेयर सदस्यबाट प्रति सदस्य रु.१०० शेयर पुँजी संकलन गरी सुरु भएको  संस्थामा हाल ६ हजार ४४ जना सदस्य छन् ।

३ करोड ५६ लाख ८१ हजार शेयर पुँजी रहेको संस्थामा २३ करोड ६७ लाख ३१ हजार ७७१ रुपैयाँ १८ पैसा बचत तथा निक्षेप, २२ करोड ३४ लाख ४४ हजार  ऋण लगानी, १ कराेड ४८ लाख ४८ लाख १९ हजार ७५८ रूपैयाँ विभिन्न काेषमा जम्मा, ३ कराेड ५१ लाख ८३ हजार ९६८ रूपैयाँ आय, ३ कराेड २४ लाख १८ हजार १९८ रूपैयाँ  व्यय, खुद सञ्चालन बचत २७ लाख ६५ हजार ७६९ रूपैयाँ, ३३ करोड ६८ लाख  २४ हजार ४६५ रुपैयाँ ५८ पैसा कुल सम्पत्ति रहेको छ ।

यसअघि संस्थाको मेचीनगर स्थित धाइजन, ज्यामिरगढी, ईटाभट्टा, खुट्टीडाँगी, भृकुटी सेवा कार्यालयहरुको ईकाइ साधारण सभा सम्पन्न भइसकेको छ ।

केही महिनाअघि मात्र काँकरभिट्टा सेवा केन्द्र ईटाभट्टा सेवा केन्द्रमा मर्ज भएको थियाे । संस्थाले यसअघि स्थापना दिवसमा टिकटक प्रतियोगिता समेत सम्पन्न गरेकाे थियाे ।

पूर्वीद्वार बचत तथा ऋण सहकारी संस्थाका अध्यक्ष विश्वेश्वर प्रसाद भट्टराई (वीपी) ले अध्यक्षतासहित अध्यक्षको बार्षीक प्रतिवेदन, लेखा परीक्षण प्रतिवेदन लेखा समिति संयोजक गोपालबहादुर राउतले प्रस्तुत गरेका थिए ।

कार्यक्रमको स्वागत उपाध्यक्ष मणिराम खतिवडाले र सञ्चालन व्यवस्थापक प्रल्हाद खड्काले गरेका थिए ।