चिमरियाद्वारा मेचीनगरमा ´शव चिस्यान गृह` बनाईदिने घाेषणा

मेचीनगर, १७ कात्तिक । अब मेचीनगरमा विदेश तथा टाडाबाट शव ल्याएमा राख्ने ´शव चिस्यान गृह` काे व्यवस्था गरिने भएको छ ।

मेचीनगरमा राम्राे छवि बनाइरहेका समाजसेवी राजन चिमरियाले ´शव चिस्यान गृह` निर्माण गरिदिने भएका हुन् ।

उनले आइतबार आफ्नो जन्मदिनमा मेचीनगरमा ´शव चिस्यान गृह` निर्माण गरिदिने घाेषणा गरेका छन् । मेचीनगर नगरपालिकाले नगरभित्र जहाँ पनि ठाउँकाे व्यवस्था मिलाईदिए ´शव चिस्यान गृह` बनाइदिने चिमरियाले बताए ।

चिमरियाले त्यसका लागि नगरभित्र जग्गा उपलब्ध गराईदिन  नगरप्रमुख गाेपालचन्द्र बुढाथोकीलाई जानकारी गराई सकेकाे बताएका छन् ।

उनका अनुसार नगरवासीकाे निधनपछि छिमेकी पालिकाहरूको अस्पतालमा शव राख्न लानु पर्ने बाध्यता छ । यसकाे अन्त्य गर्न पनि आफ्नै ठाउँ नागरिकलाई सहज हाेस् भन्ने उदेश्यले एउटा उक्त गृह निर्माण गर्ने साेच बनाएकाे उनकाे भनई छ ।

नगरपालिकाले ठाउँ दिए अनुमानित आठ लाख रुपैयाँ खर्च गरेर बनाईदिने चिमरियाकाे दावी छ ।

´नगरका अधिकांश  परिवारका सदस्य रोजगारीका लागि विदेशमा छन्` चिमरियाले भने-´कति विरामी र दुर्घटनामा परेर उतै मृत्यु हुन्छ । शव ल्याउन समस्या छ । ल्याएर राख्ने ठाउँ छैन । उतै अस्पतालमा राखे पनि महंगाे पर्छ ।
एक त उपचार महंगाे छ । खर्च जुटाउन समस्या हुन्छ । `

नेकपा माओवादी केन्द्र मेचीनगरका अध्यक्ष समेत रहेका लाेकप्रिय नेता चिमरियाले प्रत्येक वर्ष आफ्नो जन्मदिन र बैवाहिक वर्षगाँठकाे अवसरमा दिन दु:खी, असहाय, गरिव, जेहेन्दार तथा विपन्न बालबालिकाहरूलाई आर्थिक सहयोग गर्दै आएका छन् ।

चारआली साना शहरी खानेपानी तथा सरसफाइ संस्थाका अध्यक्ष चिमरियाकाे धाइजनमा ऋतिका डेरी उद्योग पनि  छ ।

मनकारी चिमरियाले समाजका लागि थुप्रै याेगदान गरेका छन् । उनले अशक्त, अपाङ्गता भएका व्यक्ति, विपद्को बेला विपन्नको घरको छानामा जस्ता पाता दिने, सहिद परिवार र किसानलाई गाई दिने, कृषि सामग्री, मजदुरलाई झुल लगायतका समाजसेवी काम गर्दै आएका छन् ।