मेचीनगर, ५ मंसिर । मेचीागर नगरपालिकाले आज ४६ जना किसानलाई कृषि औजारका सामग्रीहरु वितरण गरेको छ ।
शुक्रबार नगरपालिकाको सभाहल परिसरमा एक कार्यक्रमको आयोजना गरेर उनीहरुलाई विभिन्न प्रकारका कृषि औजारहरु वितरण गरिएको हो ।
एक जना किसानलाई एउटा कम्बाइन मिल, दुई जनालाई काउम्याट र ४३ जना किसानलाई कुटी काट्ने मेसिन वितरण गरिएको छ ।
मेचीनगर–७ को राई बंगुर फर्मका सञ्चालक रविन राईलाई एउटा कम्बाइन मिल, मेचीनगर–२ का हरिभक्त चापागाईलाई ४ वटा काउम्याट र मेचीनगर–४ को उपकार कृषि फर्मका सञ्चालक सन्तोष राईलाई १६ वटा काउम्याट प्रदान गरिएको छ ।
त्यस्तै मेचीनगर–११ का १० जना, मेचीनगर–१० का २ जना, मेचीनगर–५ र २ का १÷१ जना, मेचीनगर–८ का ९ जना, मेचीनगर–३ का १६ जना र मेचीनगर–१५ का ३ जनालाई गरी ४३ जना किसानलाई कुटी काट्ने मेसिन प्रदान गरिएको हो ।
कार्यक्रममा नगरप्रमुख गोपालचन्द्र बुढाथोकी, उपप्रमुख मीना पोखरेल उप्रेती लगायतले किसानहरुलाई उक्त औजारहरु प्रदान गरेका थिए । प्रमुख अतिथि नगरप्रमुख बुढाथोकीले पशुपालक कृषकहरुले अधिकदम फाइदा लिउन भनेर नगरपालिकाले ढिलै भएपनि व्यवस्थित ढंगले सम्बन्धित पक्षलाई वितरणमा ध्यान दिएको बताए । यस्तै उपप्रमुख उप्रेतीले थोरै वितरण गर्ने सही ढंगले वितरण गर्न सके सदुपयोग हुन्छ भन्ने आशा व्यक्त गरेकी थिइन् ।
कार्यक्रममा मेचीनगर–३ का किसान विनोद थापाले नगरपालिकाले कृषि क्षेत्रमा काम गरेका कृषकहरुलाई दिएको औजारले खेती गर्न सहज भएको बताए ।
किसानसँगको पचास प्रतिशत लागत साझेदारीमा करिव १४ लाख मुल्य बराबरको उक्त सामग्रीहरु वितरण गरिएको छ । कार्यालयको आर्थिक वर्ष २०८१÷८२ को स्वीकृत नगरस्तरीय कार्यक्रम अनुसार मागमा आधारित पशुपालन प्रवद्धन कार्यक्रम (५० प्रतिशत अनुदान) अन्तरगत आज वितरण गरिएको हो ।
कार्यक्रममा प्रमुख प्रशासकीय अधिकृत अग्निप्रसाद अधिकारी, वरिष्ठ प्रशासकीय अधिकृत अनन्तप्रकाश वस्ती, वडा नम्बर ७ का वडाध्यक्ष प्रलादमणि ओली, ३ का वडाध्यक्ष हर्कबहादुर वस्नेत, १० नम्बरका वडाध्यक्ष नारायण खनाल, कार्यपालिका सदस्य चित्र धिमाल लगायतको उपस्थिति रहेको थियो ।
नगरपालिकाका आर्थिक विकास शाखा प्रमुख दिपेन्द्र कार्कीले सहजीकरण गरेको कृषि औजार वितरण कार्यक्रमको प्रतिवेदन पशु विकास सेवा शाखा प्रमुख बिक्रम गुरुङले प्रस्तुत गरेका थिए ।
Discussion about this post