कर नतिर्न खानेपानी संस्थालाई सांसद तामाङको आग्रह

काँकरभिट्टा, ९ माघ । कोशी प्रदेशका सांसद गोपाल तामाङले सरकारले खानेपानी संस्थाहरुलाई लगाएको २५ प्रतिशत कर नतिर्न आग्रह गरेका छन् ।

काँकरभिट्टा खानेपानी उपभोक्ता तथा सरसफाइ संस्थाको आज सम्पन्न ३०औं बार्षिक साधारण सभाको प्रमुख अतिथिको रुपमा सम्बोधन गर्दै सांसद तामाङले खानेपानी विशुद्व सामाजिक संस्था भएकाले सरकारलाई कर नर्तिन अनुरोध गरेका हुन् ।

खानेपानी संस्थाहरुको महासंघलाई आन्दोलन गर्न र प्रदेशमा पनि कुरा उठाउने उनको भनाई छ । उक्त संस्थाका पूर्व अध्यक्ष समेत रहेका तामाङ नेपाली कांग्रेस कोशी प्रदेश संसदलिय दलका प्रमुख सचेतक पनि हुन् ।

खानेपानी कार्यालयहरुलाई कम्पनी सो सरह नाफाको २५ प्रतिशत कर अनिवार्य तिर्न सरकारले खानेपानी संस्थाहरुलाई परिपत्र गरेको छ ।

कार्यक्रममा कोशी प्रदेशका पूर्व सांसद श्रीप्रसाद मैनाली, मेचीनगर नगरपालिका पूर्व नगरप्रमुख विमल आचार्य, मेचीनगर नगरपालिकाका उपप्रमुख मीना पोखरेल उप्रेती लगायतले खानेपानी संस्थालाई मजवुत बनाउन सबैको सहकार्य आवश्यक रहेको बताएका थिए ।

सोही अवसरमा संस्थाले दुईजना ज्येष्ठ उपभोक्ता र एकजना कर्मचारी (सवारी चालक)लाई सम्मान समेत गरेको छ । दुईजना उपभोक्तालाई जनही नगद ५ हजार र कर्मचारीलाई ७ हजार पुरस्कार प्रदान गरिएको थियो ।

सम्मानित हुनेहरुमा विगत एघार वर्षदेखि निरन्तर जरिवाना नतिरी पानीको विल तिरिरहेका ज्येष्ठ उपभोक्ता ८८ वर्षीय दिलबहादुर गरागाई, ८१ वर्षीया अम्बिकादेवी ढुंगेल र संस्थाका कर्मचारी सवारी चालक खेमराज खतिवडा रहेका छन् ।

संस्थाका अध्यक्ष रोहितकुमार बुढाथोकीले सभामा प्रविधि मैत्री आयोजना, जिआइएसको कार्यान्वयन, जेनेरेटर खरिद, कायालर्य परिसरको सौन्दर्यकरण, संस्थाको नयाँ सभाहल, नगरविकास कोषको साँवा व्याज भुक्तानी,दिशाजन्य लेदो व्यवस्थापन तथा सेफ्टी टेङ्की सञ्चालन, थप नयाँ धारा तथा सहुलियत धारा जडान, पानीको गुणस्तर, सामाजिक सहभागिताको रकम, आगामी योजनाहरु, संस्थाका अवसरहरु र चुनौतिका विषयको प्रतिवेदन प्रस्तुत गरेका थिए ।

काँकरभिट्टा खानेपानी उपभोक्ता तथा सरसफाइ संस्थाका अध्यक्ष रोहितकुमार बुढाथोकीको अध्यक्षतामा सम्पन्न कार्यक्रमको स्वागत उपाध्यक्ष गोविन्द गिरीले र सञ्चालन सचिव विशाल तामाङले गरेका थिए ।