मेचीनगर, २१ माघ । मालपाेत कार्यालय चन्द्रगढीमा हुने सबै प्रकारका सेवा अब मेचीनगर नगरपालिकाबाटै हुने भएको छ ।
चन्द्रगढी धाउँने झनझटबाट मेचीनगरबासीले अब मुक्ति पाउने भएका छन् ।
बुधबार भूमि व्यवस्था, सहकारी तथा गरिबी निवारण मन्त्री प्रा.डा. कुमारी ईङ्नामकी सुशासन फाँटका सल्लाहकार दीपक ओलीकाे राेहवरमा भूमि सुधार तथा मालपाेत कार्यालय झापाका सुवास श्रेष्ठ र नगरप्रमुख गाेपालचन्द्र बुढाथोकीबीच सहमतिमा हस्ताक्षर भएको छ ।
नगरपालिकाले पहिलाे चरणमा राजीनामा, रोक्का र फुकुवाको काम गर्ने नगरप्रमुख बुढाथोकीले जानकारी दिए । उपप्रमुख मीना पाेखरेल उप्रेतीले विगतदेखि काेशिस गरिरहेका थियौं यसपटक सम्भव भएको बताइन् ।
निमित्त प्रमुख प्रशासकीय अधिकृत एवम् शिक्षा शाखा प्रमुख हाेमनाथ भण्डारीले जनतालाई दु:ख नदिई सहकार्य गरिदिन मालपाेत कार्यालय झापालाई अनुराेध गरेका छन् ।
हस्ताक्षर कार्यक्रममा सल्लाहकार ओली, जिल्ला मालपाेत कार्यालयका प्रमुख श्रेष्ठले स्थानीय सरकार अन्तरगत देशभरीमा मेचीनगरमा तेस्राे कार्यालयका रूपमा मालपाेतकाे सेवा सूचारू गर्ने सहमति भएको बताए ।
नियमित सेवा विस्तार अन्तरगत कार्यान्वयनका लागि मेचीनगरमा सुरू गरिएको हाे । कार्यक्रमकाे सहजीकरण वरिष्ठ प्रशासकीय अधिकृत अनन्तप्रकाश वस्तीले गरेका थिए ।
कित्ताकाट बाहेक अन्य सबै सेवाहरू नगरपालिकाबाटै सूचारू हुने राजश्व शाखा प्रमुख प्रेम पराजुलीले बताए । उनका अनुसार ससीम कित्ता भएको जग्गाकाे नामसारी, दृष्टिबन्धक, बैंक राेक्का लगायतका काम हुनेछ ।
Discussion about this post