कुलतमा फँस्ने अधिकांश ‘विद्यार्थी’

झापा, ५ भदौं । पढ्ने र सिर्जनशील काम गर्ने १८ देखि ३५ वर्ष उमेरका युवाहरु लागू औषधको कुलतमा फँस्ने गरेको एक तथ्याङ्कले देखाएको छ ।

झापामा गत आर्थिक वर्ष २०७७÷०७८ मा ३०७ जना लागू औषध मुद्धामा पक्राउ परेकाहरुमध्ये १८ देखि ३५ वर्ष उमेरका २६१ जना अर्थात् ८५ प्रतिशत रहेका छन् ।

जिल्ला प्रहरी कार्यालय झापाका सूचना अधिकारी राकेश थापाले लागू औषध मुद्धामा पक्राउ परेका अधिकांश अभियुक्त प्लस टु र क्याम्पस पढिरहेकाहरु हुने गरेको बताए । कुलतमा फँसेपछि उनीहरुको पढाई बिग्रिने गरेको छ ।

सोही आर्थिक वर्षमा १८ देखि २० वर्ष (प्लस टु पढ्ने उमेर)मा पक्राउ पर्नेहरु १५३ जना र २५ देखि ३५ वर्ष (काम गरी खाने उमेर)मा पक्राउ पर्नेहरु १०८ जना रहेको उहाँले बताउनुभयो ।
पक्राउ परेका युवामध्ये एसएलसी र प्लस टु पढ्दै गरेका १०२ जना, कक्षा १० का १०१ जना र सामान्य साक्षर १०४ जना रहेको प्रहरीको तथ्याङ्कमा जनाइएको छ ।

झापा जिल्लाको पूर्वी र दक्षिणी सीमा भारतको पश्चिम बङ्गाल र बिहार प्रान्तसँग जोडिएको छ । भारतीय सीमावर्ती बजार र खुला नाका हुँदै नेपालमा लागू औषध भित्रिदै आएको छ । कोभिड–१९ को महामारीमा नाका बन्द भएको अवस्थामा समेत लागू औषधको कारोवार झापामा घटेको छैन । आर्थिक वर्ष २०७७÷७८ मा पक्राउ परेका कूल कारोवारीमध्ये भारतीय नागरिक ८ प्रतिशत छन् ।

जिल्ला प्रहरी कार्यालयको तथ्याङ्क अनुसार आव २०७७÷०७८ मा झापामा लागू औषधको १९५ वटा मुद्धा दर्ता भएका छन् भने त्यसअघिको आव २०७६÷०७७ मा ११८ वटा मात्र मुद्धा दर्ता भएका थिए ।
जिल्लामा दर्ता भएका मुद्धा र पक्राउ परेका अभियुक्तहरुको विश्लेषण गर्दा व्यापारिक मुनाफा आर्जन गर्ने उद्देश्यले लागू औषधको प्रयोग गर्ने अपराध बढेको पाइएको छ ।

आव २०७७÷७८ मा पक्राउ परेकाहरुमध्ये ४२ प्रतिशतले लागू औषधको प्रयोग आर्थिक उपार्जनका लागि गरेको प्रहरीलाई बयान दिएका थिए । जबकि आव २०७६÷०७७ मा यो प्रतिशत २६ मात्र थियो ।
आर्थिक वर्ष २०७७÷०७८ मा पक्राउ परेकाहरुमध्ये ३८ प्रतिशतले लागू औषध सेवन गर्ने उद्देश्य रहेको बताएका थिए । २० प्रतिशतले आफ्नो उद्देश्य खुलाएनन् ।

पूर्वी नेपालको प्रमुख नाका काँकरभिट्टासँग जोडिएको भारतीय नाका पानीटङ्की नेपालमा लागू औषध भित्रिने मुख्य अखडा हो । कोरोना महामारीका कारण काँकडभिट्टा मूलनाका बन्द भएको अवस्थामा कारोवारीले उत्तर बाहुनडाँगी र दक्षिण ज्यामिरगढी क्षेत्रसँग जोडिएको खुला सीमाबाट लागू औषध लुकाईछिपाई भित्राउने गरेका छन् ।

लागू औषध ओसारपसार र विक्रीका लागि यसमा संलग्न व्यक्तिहरुले डाक्टरको सिफारिसको बहाना समेत गरेको पाइएको छ । पक्राउ परेकाहरुको वयानका आधारमा २२ प्रतिशतले डाक्टरको सिफारिस बहाना बनाएको स्वीकार गरेका थिए । शरीरमा लुकाएर ३८ प्रतिशत, सवारी साधनमा लुकाएर २३ प्रतिशत र अन्य मालसामानमा लुकाएर १७ प्रतिशतले धन्धा चलाइरहेको प्रहरीको तथ्याङ्कले देखाउँछ ।

चालु आर्थिक वर्षको साउन महिनामा मात्र २१ वटा लागू औषधका मुद्धा दर्ता भइसकेका छन् । जसमा ३१ जना अभियुक्त पक्राउ परेका छन् । साउन २४ गते दमककी एक युवती गुप्ताङ्गमा लागू औषध लुकाईछिपाई ल्याउँदै गर्दा मेचीनगरमा पक्राउ परेकी थिइन् ।

पढ्ने र काम गरी खाने उमेरका नवयुवा लागू औषधको कुलतमा फँस्नु चिन्ताको विषय बनेको छ । प्रहरीले विद्यार्थीलाई कुलतमा नलाग्न बिगतमा विद्यालयमै गएर शिक्षा दिने अभियान सञ्चालन गरेको थियो ।

सामुदायिक प्रहरी सेवा केन्द्र लगायतका विभिन्न संघसंस्थाले यस्तो अभियानमा सघाउने गरेका थिए । अहिले कोरोना कहरका कारण विद्यालय बन्द रहेको अवस्थामा कलिला युवा कुलतमा फँस्न थालेको पाइएको छ ।