मेचीनगरमा आइतबार आठसय बढीले लगाए जोन्सन खोप

धुलाबारी, २४ साउन । मेचीनगर नगरपालिकाले आइतबार नगरभरिका उद्योगी, व्यवसायी र साना सवारी चालकलाई ८ सय बढी कोभिड १९ विरुद्घको भ्याक्सिन उपलब्ध गराएको छ ।
नगरका उद्योगी व्यवसायीहरुको छाता संस्था मेची उद्योग बाणिज्य संघ मेचीनगरको संयोजनमा मेचीनगर नगरपालिकाद्वारा आयोजित नगरभरिका उद्योगी व्यवसायी र सिटी सफारी तथा अटोका चालकहरुलाई समेत लक्षित गरेर कोभिड १९ विरुद्घको भ्याक्सिन लगाउने कार्यक्रममा ८ सय बढीले भ्याक्सिन लगाएको मेची उद्योग बाणिज्य संघका सदस्य उमेश सुवेदीले जानकारी दिए ।

उनका अनुसार ६ सय नगरभरिका उद्योगी व्यवसायी र २ सय १० सिटी सफारी तथा अटोका चालक गरी ८ सय १० जनाले अमेरिकन कम्पनीको जोन्सन एण्ड जोन्सन भ्याक्सिन लगाएका थिए । मेचीनगर नगरपालिकाको स्वास्थ्य शाखा अन्तर्गतका स्वास्थ्यकर्मीहरु दीपेन्द्र चौधरी, विद्या शिवाकोटी, सुष्मिता रायमाझी खरेल, तारा शिवाकोटी र फूलमाया पोखरेलले सेवा प्रदान गरेको स्वास्थ्य शाखा संयोजक रामनारायण यादवले बताए ।

नगरपालिका र संघले भ्याक्सिन लगाउन आउनेका लागि सुविधा होस भनेर खोप परिसर मेचीनगर—१० धुलावारीस्थित आम्दा मेची अस्पतालको खुला ठाउँमा सुविधा सम्पन्न टेण्डको व्यवस्था गरेको संघका सदस्य भूमि पौडेलले बताए । पौडेलका अनुसार खोप कार्यक्रममा अनावश्यक भीडभाड नहोस भनेर एकदिन अघि खोप लगाउन आउने व्यक्तिहरुको विवरण संकलन गरिएको थियो ।

संघको संयोजनमा नगरपालिकाले नगरक्षेत्रका उद्योग, व्यवसायक्षेत्रको अग्रभागमा काम गर्ने उद्योगी, व्यवसायी, मजदुरहरुका लागि कोभिड १९ विरुद्घको अमेरिकन कम्पनीको जोन्सन एण्ड जोन्सन भ्याक्सिन खोप प्राप्त गर्न नगरपालिकाले तोकेको क्षेत्रगत मापदण्ड भित्रकालाई मात्र भ्याक्सिन लगाईएको संघका सचिव रविचन्द्र नेपालले बताए ।

मझौला उद्योगतर्फ सिमेन्ट, प्लाईउड, चाउचाउ, वेभेरेज, दाना, दाल, चामल, उद्योग, जुत्ता चप्पल, चियाबाट ५÷५, खाद्यन्न, गल्ला किराना व्यवसाय २÷२, साना उद्योगतर्फ भेनियर, रंगरोगन, पानी ३÷३, घरेलु उद्योगतर्फ धान, पिठो मिल, वेकरी, आइसक्रिम, दालमोठ, भूजिया, खाद्य उद्योगहरु २÷२ माछा मासु, तरकारी फलफूल, डेरी हार्डवयर भेटनरीबाट १÷१ जनालाई खोप लगाउने व्यवस्था संघले मिलाएको संघका कार्यकारी निर्देशक गोपाल वस्नेतले बताए ।

खोपको दुरुपयोग नहोस भनेर सम्बन्धित उद्योग व्यवसायबाट खोप लगाउन आउने व्यक्तिलाई उद्योग, फर्म तथा व्यवसाय दर्ता प्रमाण पत्र अनिवार्य गरिएको संघका अध्यक्ष ऋषिराज तिम्सनाले जानकारी दिए ।