मेचीनगरमा प्रज्ञा प्रतिष्ठान स्थापनाको तयारी

काँकरभिट्टा, ३२ साउन । मेचीनगर नगरपालिकाले नेपाल प्रज्ञा प्रतिष्ठान स्थापना गर्ने निर्णय गरेको छ ।
मेचीनगर नगरपालिकाको यहि असार १० देखि २५ गते सम्पन्न आठौँ नगरसभाले मेचीनगरमा नै नेपाल प्रज्ञा प्रतिष्ठान स्थापना गर्ने निर्णय गरेको हो ।
नगरपालिकाका वरिष्ठ प्रशासकिय अधिकृत अनन्तप्रकाश वस्तीका अनुसार केन्द्रमा जसरी नेपाल प्रज्ञा प्रतिष्ठान स्थापना भएको छ, यहाँ त्यसरी नै प्रज्ञा प्रतिष्ठान स्थापना हुन्छ ।
उनले केन्द्रमा जस्तो छ, त्यसरी नै स्थानीय सरकारले अब आफ्नै नगरमा प्रज्ञा प्रतिष्ठान स्थापना गर्न सक्ने आठौँ नगरसभाले निर्णय गरेको बताए ।
नगरभित्र छरिएर रहेका प्रतिष्ठानहरुले मेचीनगर प्रज्ञा प्रतिष्ठानमा आवद्व हुनुपर्ने कानूनी व्यवस्था रहेको वस्तीको भनाइ छ ।
प्रज्ञा प्रतिष्ठान स्थापनाका लागि त्यसको कार्यविधि, नियम, कानूनका विषयमा तयारी भईरहेको उनले जानकारी दिए ।