संगीतमा झुम्यो काँकरभिट्टा : मुख्यमन्त्री राई र नायक हमाल मुख्य आकर्षण

फोटो पत्रकार : देवेन्द्र खरेल

मेचीनगर, २४ मंसिर । पूर्वी प्रवेशद्वार काँकरभिट्टामा सांगीतिक कार्यक्रम सप्तरंगीको तेस्रो संस्करण सम्पन्न भएको छ ।

मुख्यमन्त्री राजेन्द्र राईले साँझ उद्घाटन गरेको र नायक राजेश हमाल लगायतका प्रख्यात कलाकारहरुको सहभागिता रहेको कार्यक्रम काँकरभिट्टा बसपार्कमा भएको थियो ।

जनताद्वारा, जनताका निम्ति र जनतालाई भन्ने नाराका साथ सातै प्रदेशमा आयोजना हुने यो सांगीतिक कार्यक्रम यसपटक काँकरभिट्टाबाट सुरु भएको हो ।

बिगतमा दुईवटा संस्करणका सप्तरंगी कार्यक्रम सम्पन्न भइसकेको छ ।

गृष्मा ब्रोडकास्टिङको आयोजनामा हुने ‘सप्तरंग–३’ ले सातै प्रदेशमा हजारौ दर्शक माझमा सचेतना फैलाउने आयोजकको भनाई छ ।

मंसिर २४ मा काँकडभिट्टाबाट सुरु हुने ‘सप्तरंग–३’ पुस ९ गते पोखरामा गएर अन्त्य हुनेछ । काँकडभिट्टा लगत्तै मङ्सिर २६ मा जनकपुर, २८ मा चितवन, पुस १ मा नेपालगन्ज, ३ मा सुर्खेत, ५ मा धनगढी र पुस ९ मा पोखरामा कार्यक्रम हुनेछ ।

कार्यक्रममा अभिनेता राजेश हमाल, गायक बद्री पंगेनी, प्रमोद खरेल, अनिल सिंह, हास्यकलाकार  राजा राजेन्द्र, गायिका मिलन नेवार , र अस्मिता अधिकारी , मोडेल उषा उप्रेती लगायतको उपस्थिति रहेको प्रदेश नं. १ का कार्यक्रम संयोजक बिकास घिमिरेले जानकारी दिए ।

प्रमुख जिल्ला अधिकारी श्रवण तिम्सिनाको समेत कार्यक्रममा उपस्थिति रहेको छ । सप्तरंगीका प्रमुख व्यवस्थापक गृहेन्द्र घिमिरेको सभापतित्वमा सम्पन्न कार्यक्रमको सञ्चालन नरेश भट्टराईले गरेका थिए ।