लंकाशनी महिला सहकारीको सभा

मेचीनगर, १७ पुस । मेचीनगर–१० स्थित लंकाशनी महिला समृद्घि वहुउद्देश्यीय सहकारी संस्थाको आठौं वार्षिक साधारण सभा शुक्रबार सम्पन्न भएको छ ।

संस्थाकी अध्यक्ष रुपा पौडेलको सभापतित्व तथा मेचीनगर उपप्रमुख मीना पोखरेल उपे्रतीको प्रमुख आतिथ्यता रहेको थियो ।

कार्यक्रममा प्रमुख अतिथि उप्रेतीले सदस्यहरुको जीवनस्तर उकास्ने भरपर्दाे माध्यम सहकारी भएको बताइन् । सहकारीको माध्यमबाट व्यावसायिक कृषि उत्पादनमा युवाहरुको सक्रियता बढेको बताउँदै उपप्रमुख उप्रेतीले दिगो विकास र समृद्घि सहकारीबाट मात्र सम्भव हुने बताइन् ।

सहकारी नाफा मुलक संस्था नभएकोले सदस्यहरुको आर्थिक, सामाजिक र शैक्षिक क्षेत्रमा सुधार हुनेगरी सहकारीले कार्यक्रम ल्याउनु पर्ने र सदस्यहरुले समेत आफ्नो सहकारी प्रति इमान्दार भएर कारोबार गर्नुपर्नेमा उनको जोड थियो । झापामा हाल ५ सय सहकारी र करिव ५ लाख बढी सहकारीकर्मी रहेको बताउँदै उनले एक सहकारी एक सदस्य नीतिलाई कार्यान्वयन गर्नु पर्ने बताइन् ।

सो अवसरमा सहकारीले हालै निर्माण सम्पन्न गरेको तोरी पेल्ने तथा पिसानी मिलको समेत उद्घाटन् गरेको छ । सो मिलको उद्घाटन् प्रमुख अतिथि उप्रेतीले रिविन काटेर विधिवत रुपमा गरेकी थिइन् । कार्यक्रममा मेचीनगर–१० का वडाध्यक्ष सुवेश कुमार पनेरु, समाजेवी मोहन दाहाल लगायतले बोलेका थिए ।

कार्यक्रममा नयाँ बिहानी आमा समूहकी अध्यक्ष कमला बुढाथोकी, जनजाग्रिती भजन मण्डलीका अध्यक्ष महेन्द्र पौडेल, सहकारीका सल्लाकार संयोजक उमाकान्त पौडेल, लगायतको आतिथ्यता रहेको थियो ।

कार्यक्रममा उत्कृष्ट कर्मचारीहरुलाई सम्मान समेत गरिएको थियो । सहकारीले व्यवस्थापक बिमला बिष्टलाई नगद १५ हजारसहित खादार टिका लगाएर सम्मान गरेको छ । त्यसैगरी बजार व्यवस्थापक राधा सुवेदीलाई १० हजार नगद र दुर्गा दाहाललाई ५ हजार नगद सहित खादा र टिका लगाएर सम्मान गरिएको थियो ।

कार्यक्रममा अध्यक्ष पौडेलले अध्यक्षको प्रतिवेदन प्रस्तुत गरेकी थिइन् । २०७० सालमा स्थापना भएको सहकारीमा हाल २७५ शेयर सदस्य पुगेको र सहकारीले सदस्य संख्या बृद्घि गर्न बिभिन्न सेवामुलक कार्यक्रम सञ्चालनको तयारी गरिरहेको र मिल निर्माणको लागि मेचीनगर नगरपालिकाबाट ७ लाख प्राप्त भएको र संस्थाले ६ लाख ५० हजार थप लगानी गरी कुल १३ लाख ५० हजारमा मिल सञ्चालनमा ल्याएको अध्यक्षको प्रतिवेदनमा उल्लेख छ ।

ऋण समिति संयोजक बाबुलाल राजवंशीले स्वागत गरेको कायृक्रमको सञ्चालन सचिव बलराम चिमरियाले गरेका थिए ।