मेचीनगर, १७ माघ । धुलाबारीको इष्ट होराइजन अंग्रेजी माविले ‘अन्तराष्ट्रिय स्कुल अवार्ड’ जित्न सफल भएको छ ।
ब्रिटिस काउन्सिलले सन २०१९ र २० मा सञ्चालन गरेको अन्तराष्ट्रिय स्कुल अवार्ड (आईएसओ) कार्यक्रममा ईष्ट होराइजनले सो उपाधि जित्न सफल भएको हो ।
ब्रिटिस काउन्सिलले केहि दिनअघि काठमाडौँमा सो अवार्डको घोषणा गरेको थियो ।
ब्रिटिस काउन्सिलले व्यवहारिक शिक्षा र प्रयोगात्मक शिक्षण प्रणाली आजको आवश्यता भन्ने मुल कुरालाई आत्मसाथ गरेर सो कार्यक्रम सञ्चालन गरेको थियो ।
सोहि अनुसार विद्यालयले प्रयोगात्मक परियोजना अन्तरगत सात वटा शिर्षकमा विभिन्न कक्षाका विद्यार्थीहरुलाई परियोजना दिइएको थियो ।
सो परियोजना विद्यार्थीहरुले सफलताका साथ सम्पन्न गरेकाले आईएसओ उपाधि हात पारेको ईष्ट होराइजनका प्रिन्सिपल सन्दिप राईले बताए ।
भोक र कुपोषण, साहित्यकार झमक घिमिरेको जीवनी, आधुनिक खेती र परम्परागत खेती, दुग्ध उत्पादन, सादरी एक अद्वितीय भाषा, बैकल्पिक प्रयोजन, पानीको महत्वका सात वटा शिर्षकमा कार्यक्रम भएको शिक्षक विकास ग्वालले बताए ।
कक्षा १ देखि १२ सम्मका विद्यार्थीहरुले सो कार्यक्रममा सहभागी भएको परियोजनाका संयोजक नविन दाहालले जानकारी दिए ।
अन्तराष्ट्रिय स्तरको नागरिक उत्पादन गर्ने र ग्लोबल नागरिकका रुपमा आफ्ना विद्यार्थीहरुको विकास गर्ने उद्देश्यका साथ उक्त कार्यक्रममा विद्यार्थीहरुलाई सहभागी गराईएको प्रिन्सिपल राईले बताए ।
युके, भारत, पाकिस्तान, बंगलादेश लगायत विभिन्न राष्ट्रका विद्यार्थीहरुसँग भिडियो कम्फ्रेस मार्फत आफुहरुले गरेको परियोजना र शिक्षण सिकाई गतिविधिको बारेमा एक आपसमा सहकार्य गरेर आदान प्रदान गरेका थिए ।
सन २०१९ मा अन्तराष्ट्रिय सहकार्य गर्ने क्रममा होराइजनका कक्षा ५ का विद्यार्थीहरु भारतको राजेस्थान स्थित एचजीआई अन्तराष्ट्रिय स्कुलमा भाग लिएका थिए ।
‘मेहेनत र परिश्रम गरे कुनै पनि कार्य असम्भव छैन’, विद्यालयकी प्रमुख प्रशासक साबित्रा राईले भनिन्–‘शिक्षक–शिक्षिकाहरुको राम्रो सहकार्य र एकताले नै आफुहरुले अन्तराष्ट्रिय स्कुल अवार्ड जित्न सफल भएका छौँ ।’
Discussion about this post