मेचीनगर, २७ माघ । बेलायतको फोक्सटनमा निर्वाचित पहिलो नेपाली काउन्सिलर धनकिरण गुरुङको ‘यसरी घुरेर’ बोलको नेपाली गीतको म्युजिक भिडियो युट्युबमा लोकप्रिय भएको छ ।
बेलायतको युट्युब च्यानल डीजी प्रोडक्सनबाट गत शुक्रवार साँझ ५ बजे उक्त भिडियो पहिलोपल्ट प्रशारण भएको हो ।
प्रशारण भएको पाँच दिनमै सो भिडियो दुई लाख १२ हजार भन्दा बढी दर्शकले हेरिसकेका छन् ।
गुरुङको उपस्थितिमा काठमाडौंको हुकुम दरबार होटलमा म्युजिक भिडियोको प्रिमियर शो गरिएको थियो ।
‘यसरी घुरेर’ गीतको म्युजिक भिडियोमा लोकप्रिय हाँस्यव्यंग्य अभिनेता बुद्धि तामाङ (हैट), रिया लगायतका कलाकारको अभिनय रहेको छ ।
गीतको रचना र भिडियोको निर्देशन गुरुङ आफैले गरेका हुन् । गोर्खा मेमोरियल फन्ड युकेका संस्थापक अध्यक्ष समेत रहेका उनी भूपू ब्रिटिश गोर्खा सैनिक हुन् । उनी संगीतमा विशेष रुचि राख्छन् ।
म्युजिक भिडियो सार्वजनिक भएको भोलिपल्ट गुरुङ बेलायत फर्किएका थिए । उनी झापामा एक साता रहँदा विभिन्न कार्यक्रममा सहभागी भएका थिए ।
Discussion about this post