काँकरभिट्टा मावि : २९ विद्यार्थी विरामी, क्यान्टिन सञ्चालक नियन्त्रणमा

मेचीनगर, ९ भदौ । काँकरभिट्टा माध्यमिक विद्यालयको परिसर भित्र रहेको क्यान्टिनमा खाजा खाएका २९ जना विद्यार्थीहरु विरामी परेका छन् ।

विहीबार दिउसो परिसर भित्रको क्यान्टिनमा खाजाकोरुपमा छोलामुरै खाएका सो संख्याका विद्यार्थीहरु एकाएक विरामी परेका हुन् ।

कक्षा १ देखि ६ सम्मका विद्यार्थी विरामी परेका थिए । २६ जना विद्यार्थीहरुलाई मेची प्रादेशिक अस्पताल भद्रपुरमा उपचारका लागि भर्ना गरिएको विद्यालयका प्रधानाध्यापक हरिप्रसाद न्यौपानेले बताए । चिकित्सकका अनुसार फुडपोइजन भएको बताइएको छ ।

प्रधानाध्यापक न्यौपानेले खाजा खाएका ३२ जना विद्यार्थी मध्ये सुरुमा २६ जना र पछि थप ३ जना गरेर २९ जना विरामीलाई अस्पतालमा उपचार गर्न लगिएको बताए । ३ जना विद्यार्थीको सामान्य अवस्था भएकोले अभिभावकलाई जिम्मा दिइएको उनले बताए ।

विद्यार्थीहरुको अवस्था सामान्य रहेको र उनीहरुलाई घर ल्याइएको प्रधानाध्यापक न्यौपानेले जानकारी दिए ।

‘विद्यालयले दिवा खाजा विद्यार्थीलाई निःशुल्क दिने गरेको छ’, प्रधानाध्यापक न्यौपानेले भने–‘विद्यालयकै चौकिदारले क्यान्टिन सञ्चालन गर्दे आएका छन् । गर्मी थियो, खाजाबासी थियो कि भन्ने कुरा आएको छ । त्यसको छानविन हुन्छ ।’

क्यान्टिनको खाजा खाएपछि विद्यार्थीहरु एकाएक विरामी भएको विद्यालय व्यवस्थापन समितिका अध्यक्ष भवानी केरुङले बताए । खाद्यको टोलीले विद्यार्थीले खाएको खाजाको गुणस्तर थियो कि थिएन जाच्ने काम भएको उनले बताए ।

काम भएको छ । त्यसको सेम्पुल जाँचका लागि लगिएको छ । क्यान्टिन सञ्चालक एवम् विद्यालयका चौकिदार नारायण विष्टलाई इलाका प्रहरी कार्यालय काँकरभिट्टाले नियन्त्रणमा लिएको छ । छानविन नहुँन्जेलका लागि क्यान्टिन बन्द गरिएको न्यौपानेको भनाई छ ।

फोटो : देवेन्द्र खरेल