झापा क्षेत्र–१ ‘क’ बाट उम्मेद्वार बन्ने राजु कार्कीको घोषणा

मेचीनगर, १४ भदौ । नेकपा एमालेका युवा नेता राजु कार्कीले आगामी ४ मंसिरमा हुने प्रदेश सभाको चुनावका लागि झापा क्षेत्र नम्बर १ को ‘क’ बाट उम्मेद्वार बन्ने घोषणा गरेका छन् ।

उनले लोकतन्त्र पोस्टसँगको कुराकानीमा झापा क्षेत्र नम्बर १ को ‘क’ बाट उम्मेद्वार बन्ने इच्छा जाहेर गरेका हुन् । कार्की मेचीनगरका एउटा लोभलाग्दा र सशक्त युवा नेताका रुपमा परिचित छन् ।

मेचीनगर–६ काँकरभिट्टा निवासी कार्कीको अहिलेसम्मको राजनीतिक जीवन नेकपा एमालेमै व्यतित छ । उनी २०४९ सालमा अनेरास्ववियुको प्रारम्भिक कमिटी सदस्य थिए । कार्की ०५४ देखि ०६१ सालसम्म युवा संघ नेपालको जिल्ला कोषाध्यक्ष, सचिव, ०६४ सालमा २ पटक केन्द्रीय सदस्य र केन्द्रीय सचिव भइसकेका छन् ।

उनले ०५५ सालमा नेकपा एमालेको संगठित सदस्य प्राप्त गरेका थिए । कार्की लामो राजनीतिक अनुभव बोकेका नगरका एक सक्षम तथा सफल युवा व्यवसायीको रुपमा परिचित छन् । कार्की हाल एमाले १ नम्बर प्रदेश कमिटी सदस्य हुन् ।
देश हाक्ने जिम्मा युवाहरुलाई दिनुपर्छ भन्दै क्षेत्र नम्बर १ का युवाहरुले युवा नेता कार्कीलाई उम्मेद्वार बनाउन पार्टीमा आग्रह गर्न थालेका छन् ।

यता सत्ता गठबन्धनको नेपाली कांग्रेसका तर्फबाट झापा क्षेत्र नं. १ ‘क’ मा कांग्रेसका जिल्ला उपसभापति केशवराज पाण्डे, पुष्पराज पौडेल, गोपाल तामाङ, माओवादी केन्द्रका नेता माधव अर्याल र नेकपा एकीकृत समाजबादीका वीपी भट्टराई र सुभद्रा अर्यालको चर्चा चलिरहेको छ ।

एमालेले मंसिर ४ गते हुने प्रतिनिधिसभा र प्रदेशसभा सदस्य निर्वाचनका लागि मापदण्ड निर्धारण गरेको छ । एमालेको हालै बसेको केन्द्रीय कमिटी बैठकले मापदण्ड तयार पार्दै यहि २२ भदौभित्र उम्मेद्वार सिफारिस गर्न मातहतका निकायलाइ निर्देशन दिएको छ ।

एमालेले पार्टी नीति र कार्यक्रमप्रतिको प्रतिवद्धता, लोकप्रियता र विजयको सुनिश्चितता, पार्टीप्रतिको निष्ठा र आन्दोलनमा योगदान, सन्तुलन र समावेशिता तथा निर्वाचन कानुन बमोजिमको योग्यता भएको व्यक्तिलाई उम्मेद्वार बनाउन सक्ने मापदण्ड तोकेको छ ।

बैठकले प्रतिनिधिसभाका लागि सम्बन्धित प्रतिनिधिसभा क्षेत्र समन्वय कमिटी र प्रदेशका लागि सम्बन्धित प्रदेश सभा क्षेत्र समन्वय कमिटीबाट उम्मेद्वारको सिफारिस गर्न निर्देशन गरेको छ ।

क्षेत्रीय कमिटीहरूले गरेको सिफारिसमा आवश्यक भए जिल्ला र प्रदेशले रायसहित सिफारिस गर्न निर्देशन गरिएको प्रचार विभाग प्रमुख पृथ्वीसुब्बा गुरुङले बताएका छन् ।

गुरुङका अनुसार सिफारिस गर्दा एक महिलासहित ३ जनाको नाम सिफारिस गर्नुपर्नेछ । यस्तै समानुपातिक निर्वाचन प्रणालीबाट सांसद बनेकालाई फेरि नदोहोर्याउने निर्णय पनि गरेको छ ।