काँकरभिट्टा, २८ असोज । मेचीनगर नगरपालिकाका मेयर गोपाल चन्द्र बुढाथोकीले खेलकुद क्षेत्रले मेचीनगरलाई चिनाएको बताएका छन् ।
शुक्रबार काँकरभिट्टा स्थित सामुदायिक हलमा मेची ब्याडमिन्टन क्लबको पद हस्तान्तरण कार्यक्रममा बोल्दै उनले स्वास्थ्य रहेर मात्र होइन पहिचान र राष्ट्रका लागि मेचीनगरका खेलाडीहरु अग्र भागमा रहेको बताए ।
‘पहिला रोलिङ क्लब धुलाबारी देशमै चर्चित थियो’, मेयर बुढाथोकीले भने–‘अहिले फुटबल, ब्याटमिन्टन, क्रिकेट, कराते लगायतका क्षेत्रमा मेचीनगर अब्बल रहेको छ ।’
उनका अनुसार पछिल्लो समय जग्गाको भाउ बढेपछि खेलकुद मैदानको अभाव हुन थालेको छ । त्यसको अध्ययन र अवलोकन गरेर खेलकुद मैदानको संरक्षण गर्ने उनले बताए ।
‘खेलकुद क्षेत्रको माथिल्लो निकाय गुटबन्दी धेरै हावी हुन थालेको छ’, मेयर बुढाथोकीले भने–‘ जिल्लामा पनि त्यस्तै छ । खेलकुद क्षेत्रलाई स्वस्थ राख्न सबै एकजुट हुनु पर्छ ।’
उनले क्लबको विरासतलाई धुमिल हुन नदिन नयाँ कार्य समितिलाई बधाईसहित शुभकामना दिएका थिए ।
कार्यक्रममा प्रमुख अतिथि मेयर बुढाथोकी, मेचीनगर–६ का वडाध्यक्ष एवम् क्लबका पूर्व अध्यक्ष ललितबहादुर तामाङ र क्लबका नर्वनिर्वाचित अध्यक्ष ओमप्रकाश दाहालले प्रतिवद्वतासहितको शुभकामना मन्तव्य राखेका थिए ।
क्लबका पूर्व अध्यक्ष तामाङले यहिँ उत्पादन भएका खेलाडीहरु अहिले राष्ट्रिय तथा अन्तराष्ट्रिय ब्याटमिन्टनमा खेलिरहेको बताए । नेपाली सेनाबाट अमिता गिरी, जेसिका गुरुङ र सुनिना मुखिया, त्यस्तै सशस्त्र प्रहरीबाट प्रनिश ठकुरी र नेपाल प्रहरीबाट गौरव दाहालले अहिले पनि राष्ट्रिय तथा अन्तराष्ट्रिय स्तरको ब्याटमिन्टन प्रतियोगितामा भाग लिइरहेको उनको भनाई छ ।
कार्यक्रममा क्लबका पूर्व उपाध्यक्ष विष्णुप्रसाद सिटौला, सामाजिक अगुवा सोमराज ढकाल, जिल्ला फुटबलका प्रशिक्षक दीपक कार्की, सशस्त्र प्रहरी निरीक्षक सुनिलकुमार श्रेष्ठ, प्रहरी निरीक्षक अनिल माबोहाङ्ग लगायत खेलाडीहरुको सहभागिता रहेको थियो ।
क्लबको अध्यक्षमा ओमप्रकाश दाहाल, वरिष्ठ उपाध्यक्षमा रुपेश मगर, उपाध्यक्षमा दीपक घिमिरे, महासचिवमा अरुणकुमार प्रधान, सचिवमा डिल्लीराम काफ्ले र कोषाध्यक्षमा हरिबहादुर सिग्देल तथा सदस्यहरुमा रविन सुवेदी, सन्तोष कार्की, आमेप्रकाश दुलाल, अशोककुमार राई र आशिस गजमेर छन् ।
क्लबको १५ सदस्यीय समितिमा वडा अध्यक्ष पदेन सदस्य र ४ जना पछि मनोनित गरिने जनाएको छ ।
निर्वाचन समिति संयोजक दीपक पोखरेलको अध्यक्षतामा सम्पन्न कार्यक्रको स्वागत क्लबका पूर्व सदस्य नरबहादुर खड्का र सञ्चालन निर्वाचन समितिका सदस्य हस्तबहादुर आङदेम्वेले गरेका थिए ।
Discussion about this post