हाम्रो नेपाल साकोसको प्रतिवेदन सार्वजनिक

बिर्तामोड, ३ पुस । हाम्रो नेपाल बचत तथा ऋण सहकारी संस्थाले १०औँ वार्षिक साधारण सभाका लागि प्रतिवेदन सार्वजनिक गरेको छ ।

आइतबार आयोजित पत्रकार सम्मेलनमा संस्थाका अध्यक्ष भवानीप्रसाद दंगालले सो कुरा सार्वजनिक गरेका हुन् ।

साधारण सभाको प्रतिवेदन सार्वजनिक गर्दै अध्यक्ष दंगालले संस्थाको कारोबार एक अर्ब ९२ करोड पुगेको बताए । अध्यक्ष दंगालले संस्थाको शेयर पुँजी १७ करोड २२ लाख ९१ हजार पुगेको छ र बचत संकलन ९० करोड ५१ लाख २८ हजार रहेको जानकारी दिए ।

एक अर्ब ७१ करोड ८८ लाख १३ हजार कर्जा लगानी गरेको हाम्रो नेपाल साकोसको विभिन्न कोषहरुमा १२ करोड रकम रहेको प्रतिवेदनमा उल्लेख गरिएको छ । संस्थाले आर्थिक बर्ष २०७८÷७९ मा ४६ लाख २ हजार खुद नाफा कमाएको छ । संस्थाको तरलता १४.५८ प्रतिशत रहेको पत्रकार सम्मेलनमा जानकारी गराइएको थियो ।

२०६९ सालबाट शुरु भएको हाम्रो साकोसले अहिले झापा, इलाम र मोरङका ३० ठाउँमा सेवा केन्द्र सञ्चालन गरेको छ । २४ हजार ९ सय ६३ जना संस्थामा शेयर सदस्य रहेका छन । संस्थामा ३१४ जना कर्मचारीहरु रहेका छन् ।

संस्थाको बाल बचतमा ६ हजार ३ सय ९८ जना वाल सदस्यहरु छन् । संस्थाको पुस ४ गतेदेखि इकाई साधारण सभाहरु सुरु हुनेछ । संस्थाको माइन्यूट प्रमाणिकरणका लागि साधारण सभा यहि पुस २३ गते बिर्तामोडमा हुने बताइएको छ ।