झापा, ७ फागुन । नेपाल कम्युनिस्ट पार्टीका केन्द्रीय सदस्य तथा मेची ब्युरो इन्चार्ज सुमनसिंह सीले बैंक तथा वित्तीय संस्थाहरुले व्याजदर नघटाएसम्म ऋण नतिर्न र तिनका विरुद्ध गोलवद्व हुन अपिल गरेका छन् ।
नेकपाको केन्द्रीय नीति अनुसार झापा जिल्ला पार्टीको आयोजनामा बिर्तामोडमा भएको बैंक तथा वित्तीय संस्थाहरुको ज्यादती विरुद्धको प्रदर्शनलाई सम्बोधन गर्दै मेची ब्युरो इन्चार्ज सुमनसिंहले बैंक तथा वित्तीय संस्थाहरूको ऋण तिर्ने तर त्यसको ब्याजदर घटाएपछि मात्रै तिर्ने भन्दै पीडितहरुलाई यसका विरुद्ध सडकमा उत्रन र उक्त आन्दोलनको नेतृत्व नेपाल कम्युनिस्ट पार्टीले गर्ने बताएका हुन् ।
उनले बैंक तथा वित्तीय संस्था, मिटर ब्याजिहरुको दवाव, धम्की र चर्को व्याजका कारण धेरैले आत्महत्या गरेको भन्दै आत्महत्याले समस्या समाधान नहुने भएकोले ज्यादतीका विरुद्ध संघर्ष गर्नुपर्ने र आत्महत्या होइन सचेत बिद्रोह गर्न जनता अग्रसर हुनु पर्ने बताए ।
प्रदर्शन कार्यक्रमलाई सम्बोधन गर्दै नेता सुमनसिंहले भने–“दलालहरुले बैंकबाट सस्तो ब्याजमा ऋण लिएर मिटर व्याजमा लगाएका छन् । कसैले ठगेर भागेका छन्, तिनीहरुलाई खोजीखोजी कालोमोसो दलेर कारवाही गर्नुपर्छ ।
प्रदर्शनका क्रममा झापाका बैंक, वित्तीय संस्था तथा मिटर ब्याजबाट पीडित १० जनाले आफ्नो गुनासो सहित आक्रोश ब्यक्त गरेका थिए । बिर्तामोड स्थित पश्चिम बस स्टेशनबाट सुरु भएको विरोध प्रदर्शनमा पीडित व्यक्ति तथा किसान, पार्टीका नेता–कार्यकर्ताले हलोजुवा सहित विभिन्न नारा लेखिएका प्लेकार्ड समेत प्रदर्शन गर्दै नाराबाजी गरेका थिए ।
कार्यक्रममा प्रमुख अतिथि सी, केन्द्रीय सल्लाहकार सदस्य होम खतिवडा, केन्द्रीय सदस्य तथा झापा जिल्ला इन्चार्ज प्रशान्त सी लगायतका जिल्ला नेताहरूको आतिथ्यता रहेको थियोे । उक्त कार्यक्रमको सञ्चालन जिल्ला सचिव सञ्जय सीले गरेका थिए ।
Discussion about this post