मेचीनगर, १६ असार । मेचीनगर नगरपालिकाले चिया बगानका रुखमा प्रयोग गरिएका पहेँलो संकेत (स्टिकर) हटाउने भएको छ ।
स्टिकरका कारण मौरी लगायतका मित्रजीव टासिई नष्ट हुने भएका कारण नीति नै बनाएर निरुत्साहित गर्ने भएको हो ।
पालिकाले हालै सार्वजनिक गरेको बजेट तथा नीति कार्यक्रममै सो कुरा उल्लेख गरिएको छ । नगर क्षेत्रभित्र टोकला, सतिघट्टा लगायतका ठूला र साना गरी करिब एक हजार बिघा जमिनमा आधा दर्जन बढी चिया बगान छन् ।
चियालाई कीराबाट जोगाउन बगानभित्रका रुखमा पहेँलो स्टिकर टाँस्ने चलन छ । जसका कारण मित्रुजीव नै नष्ट हुने थालेपछि पालिकाले
बाध्य भएर स्टिकर नै हटाउने नीति नै अवलम्बन गर्ने भएको हो । मेचीनगर नगरपालिकाकी उपप्रमुख मीना पोखरेल उप्रेतीले पहेँलो स्टिकरले अन्य जीवमा पर्ने असरको बारेमा अध्ययन नै नगरी बगान मालिकले जथाभावी प्रयोग गरेको बताइन् ।
‘पछिल्लो समय नगरमा तोरी खेती र मौरीपालनमा किसानको आकर्षण बढेको छ’, उनले भनिन्, ‘तर बगान क्षेत्रमा चर्न आउने मौरीजस्ता मित्रजीव त्यही स्टिकरमा टाँसिएर मर्छन् ।’
उनले नगर क्षेत्रभित्रका चिया किसानसँग तत्काल छलफल गरेर स्टिकर हटाउने तयारी भइरहेको जानकारी दिइन् ।
Discussion about this post