एक्सेलको खुद नाफा ४ करोड ४९ लाख

बिर्तामोड, १७ असार । एक्सेल डेभलपमेन्ट बैंकले आर्थिक संकटको बेला पनि आफ्नो कारोवारमा वृद्धि गर्न सफल भएको छ ।

बैंकले विगतको भन्दा चालू आर्थिक वर्षमा निक्षेप संकलन र कर्जा लगानीमा वृद्धि गर्न सफल भएको बैंकको शनिवार सम्पन्न १७ औं वार्षिक साधारण सभामा जानकारी दिइएको छ ।

साधारण सभामा बैंकको वित्तीय अवस्था बारे जानकारी दिँदै प्रमुख कार्यकारी अधिकृत (सीइओ) इन्द्रकुमार कट्टेलले चालू आर्थिक वर्ष २०७९÷०८० मा १३ अर्ब २५ करोड रुपैयाँ बचत (निक्षेप) संकलन भएको बताए ।

त्यसअघिको आर्थिक वर्ष २०७८÷०७९ मा निक्षेप संकलन १२ अर्ब १७ करोड ३१ लाख १२ हजार रुपैयाँ थियो । कोरोना महामारी र विश्वव्यापी वित्तीय संकटका बेला यसरी बचत संकलनमा वृद्धि हुनुलाई बैंकले उपलब्धिको रुपमा लिएको छ ।

बैंकले चालू आव २०७९÷०८० को नौ महिनामा नै कर्जा लगानी १० अर्ब ७९ करोड २७ लाख ३४ हजार रुपैयाँ पुर्याएको जनाएको छ । अघिल्लो आव आव २०७८÷०७९ मा १० अर्ब ५० करोड ४० लाख ७० हजार रुपैयाँ कर्जा लगानी भएको थियो ।

आर्थिक गतिविधि बढाउन सफलता पाएको एक्सेल बैंकले अरु बैंकले झैं मुनाफा आर्जनमा भने अपेक्षित उपलब्धि हासिल गर्न सकेन ।
साधारण सभामा प्रतिवेदन प्रस्तुत गर्दै बैंक सञ्चालक समितिका अध्यक्ष महेन्द्रकुमार गोयलले चालू आवको नौ महिनामा ४ करोड ४९ लाख ५७ हजार रुपैयाँ मात्र खुद नाफा भएको जानकारी दिए । आव २०७८÷०७९ मा खुद नाफा ९ करोड ६४ लाख ५६ हजार रुपैयाँ थियो ।

कोरोना महामारी पश्चात बैंकको नाफामा गिरावट आएको देखिन्छ । आव २०७७÷०७८ मा बैंकले १३ करोड ३६ लाख ८२ हजार रुपैयाँ खुद नाफा गरेको थियो ।

कोरोना महामारी, आर्थिक मन्दी र बैंक विरोधी गतिविधिका कारण बैंकको आर्थिक प्रगतिमा नकारात्मक प्रभाव परेको जनाउँदै सीइओ कट्टेलले आगामी वर्षदेखि प्रभावकारी परिणाम र परिवर्तनका सकारात्मक सूचकहरु देखा पर्ने विश्वास सभालाई दिलाए ।

कोशी प्रदेशको झापा, इलाम, पाँचथर, सुनसरी र मोरङ गरी पाँच जिल्लामा एक्सेल बैंकका ४४ शाखा सञ्चालनमा छन् । आगामी वर्ष कोशी प्रदेशका थप जिल्लामा ३ वटा शाखा विस्तार गरिने बताइएको छ ।

सञ्चालक समितिका अध्यक्ष गोयलको अध्यक्षतामा भएको साधारण सभामा संस्थापक सञ्चालकहरु गणेशप्रसाद खनाल र सुरेशप्रसाद अग्रवालले रचनात्मक सुझावसहित मन्तब्य व्यक्त गरेका थिए ।

कम्पनीका सचिव श्यामबहादुर बोहोराले सभाको सञ्चालन र सीइओ कट्टेलले बैंकको वत्र्तमान अवस्था र भावी कार्ययोजनाका बारेमा धारणा राखेका थिए ।

संस्थापक गणेशप्रसाद खनाललाई सो अवसरमा सम्मानित गरिएको थियो । सभामा सञ्चालक समितिका सदस्यहरु राजन शर्मा, अमितकुमार अग्रवाल, पर्शुराम दाहाल, पुरुषोत्तम लम्साल, पेशलराज पोखरेल र शुष्मा शर्माको उपस्थिति रहेको थियो ।

साधारण सभामा बैंकका शेयरधनी, सञ्चालक समितिका पूर्व पदाधिकारी, कर्मचारी, पत्रकार लगायतको उपस्थिति रहेको थियो ।