तक्षशीलामा विदेशीस्तरको पढाई

झापा, १२ साउन । झापामा नै पहिलो पटक बेलायतको क्याम्ब्रिज विश्वविद्यालयसँग आवद्ध भएको तक्षशीला प्रोग्रेसिभ इङ्लिस स्कूलले थप सेवा विस्तार गरेको छ ।

बिर्तामोड–६ स्थित तक्षशीला प्रोग्रेसिभ इङ्लिस स्कुलले राजधानी बाहिर झापामा नै पहिलो पटक अन्तर्राष्ट्रिय स्तरको आधुनिक प्रणालीमा पठनपाठन गराउने गरी सेवा विस्तार गरेको छ ।

विहीबारदेखि स्कुलले स्वीमिङ पुल, नयाँ स्मार्ट कक्षा कोठा, लाइब्रेरी लगायतका सुविधाहरु थप गरेको छ । विद्यार्थीहरुलाई स्वीमिङ सिकाउनका लागि विद्यालयले स्वीमिङ पुल निर्माण गरेको छ । स्वीमिङ पुलमा शिक्षक राखेर पौडिन सिकाउने स्कुलले जनाएको छ ।

स्वीमिङ पुल, नयाँ स्मार्ट कक्षा कोठा, लाइब्रेरीको स्कुलका सञ्चालक दुर्गा प्रसाईले उद्घाटन गरेका थिए । उनले काठमाडौं, विराटनगर लगायतका जिल्ला बाहिरका विद्याथीहरुलाई समेत लक्षित गरी अन्तर्राष्ट्रिय स्तरको विद्यालय आफूहरुले सञ्चालन गरेको बताए । उनले भारतको दार्जिलिङभन्दा राम्रो शिक्षा दिने आफूहरुको योजना रहेको जानकारी दिए ।

कार्यक्रममा अभिभावकहरुको समेत उपस्थिति रहेको थियो । कक्षा १ का महिला शिक्षकहरु शक्तिकुमारी तामाङ, अनिमा गिरीले स्कुलमा हुने गरेको पठन–पाठनको शैलीबारे जानकारी दिएका थिए । उनीहरुले विद्यार्थीहरु विदाका दिन पनि घरमा बस्न नमानी विद्यालयमै जान खोज्ने गरी आफूहरुले वातावरण बनाएको बताए । कार्यक्रममा विद्यार्थीहरुले आ–आफ्नो प्रतिभा प्रस्तुत गरेका थिए ।

स्कुलमा ८० जनाभन्दा बढी विद्यार्थी अट्ने क्षमता भएको लाइब्रेरी निर्माण गरिएको छ । स्कुलका एकाडेमिक डाइरेक्टर डा. भिक्टोर इग्नेसियस जोन जोसेफले लाइब्रेरीमा ३ हजारभन्दा बढी पुस्तक राखिएको बताए ।

त्यस्तै कक्षा १ का विद्यार्थीहरुका लागि तीन वटा स्मार्ट कक्षा कोठा निर्माण गरिएको छ । अन्तर्राष्ट्रिय स्तरको सेवा सुविधा भएको एउटा कक्षा कोठामा २० जनाका दरले अट्नेगरी ३ वटा कक्षा कोठा निर्माण गरिएको डा.जोसेफले बताए । बेलायतको क्याम्ब्रिजसँगै तक्षशीला ब्रिटिश काउन्सिलसँग पनि आवद्ध भएको छ ।

ब्रिटिश काउन्सिलको एम्बासेडर भएको डा.जोसेफले बताए । उक्त स्कुल भारत आन्ध्र प्रदेशको एस. आर. एम. युनिभर्सिटीसँग आवद्ध भएको छ भने स्वीडेनको लिटल आइन्सटाइनसँग पनि आवद्धता जनाएको बताएका छ । स्कुलले आगामी सरस्वती पूजादेखि मोन्टेश्वरी कक्षा सञ्चालन गर्ने भएको छ ।

स्कुलले क्लिनिक, विज्ञान प्रयोगशाला, सुविधा सम्पन्न मल्टिपर्पोज हल पनि निर्माण गर्न लागेको जनाएको छ । स्कुलमा अध्ययनरत विद्यार्थीहरुका लागि बिर्तामोड स्थित बीएण्डसी हस्पिटलमा उपचार गराउँदा २० प्रतिशत छुट गराउने सहमती समेत भएको डा.जोसेफले जानकारी दिए ।

हरेक कक्षा कोठामा अलग–अलग थिमअनुसार डेकोरेशन गरिएको छ । विद्यार्थीहरुलाई पेन्सिल, जंगल र पानीमुनि बसेको जस्तो अनुभूति गराउने गरी कक्षा कोठा तयार गरिएको उनको भनाई छ ।

तक्षशीला प्रोग्रेसिभ इङ्लिस स्कुल १७ वर्ष अघिदेखि स्थापना भएको हो । स्कुल विगत ६ महिनादेखि नयाँ व्यवस्थापनमा सञ्चालनमा रहेको छ ।