दाजु–भाइ मिलेर काकाको छोराको हत्या

मेचीनगर, २ भदौ । मेचीनगर–८ का ३५ वर्षीय सुन्दरलाल किसानको हत्या आफ्नै नातेदारबाट भएको खुलेको छ ।

किसानको हत्या आरोपमा पक्राउ परेका सोहि ठाउँका ५६ वर्षका रामजी किसान र ४८ वर्षका सुनरसी किसान आफ्नै नातेदार रहेको अनुसन्धानबाट पुष्टि भएको छ ।

जिल्ला प्रहरी कार्यालय झापाले किसानको हत्या आरोपमा पक्राउ परेका रामजी र सुनरसी वडाबाका छोराहरु रहेको बताइएको छ ।

जेठो रामजी र माइलो सुनरसी दाजु–भाइ हुन् भने सुन्दर किसान काकाका छोरा रहेको वडा नम्बर ८ का वडाध्यक्ष गिरीराज धमलाले बताए ।

रामजी र सुन्दरका बुबा फरक हुन् तर आमा एउटै रहेको उनले बताए ।

‘उनीहरुको हजुर आमाको १८ विगाहा मोहिनी हकको जग्गा थियो’, वडाध्यक्ष धमलाले भने–‘सो जग्गा रामजी र सुनरसीका बुबाहरुले पाएका रहेछन् । सुन्दरका बुवालाई चाहिँ सो जग्गा दिएनछन् ।’

पक्राउ पर्नुअघि रामजीले सुन्दरको बुबा रामलाल किसान (काका) ले नागरिकता बनाइदिने जग्गा चाहिँ नदिने भनेर मेरो बुबालाई खुकुरीले त्यति बेलै काटन खोजेको कुरा मलाई सुनाएको वडाध्यक्ष धमलाले बताए । मृतक सुन्दर रामलालका एक्लो छोरा हुन् ।

सायद उनीहरुको जग्गा वा अरु केहि पुरानो रिसीवीका कारण सुन्दरको हत्या भएको हुनसक्ने वडाध्यक्षका अनुमान छ । सुन्दरका बुबा रवि जिवितै छन् ।

वडा नम्बर ८ स्थित सेन्ट्री टोलका ३५ वर्षीय सुन्दरको शव पैनीको झाडीमा भेटिएको थियो ।

सुन्दरको घाँटी काटिएको र टाउकोमा चोटै चोट भएको अवस्थामा शव फेला परेको थियो । घटनास्थल नजिकै सिक्कल र रड भेटिएको थियो ।

आज जिल्ला प्रहरी कार्यालय झापाले सुन्दर किसानको हत्या आरोपमा पक्राउ परेका उनका दाजुहरु रामजी र  सुनरसी किसानलाई सार्वजनिक गरेको छ ।