मेचीनगर, ११ माघ । अन्तर्राष्ट्रिय भन्सार दिवसको अवसरमा पूर्वी नाका काँकरभिट्टामा सरोकारवाला निकायसँग विभिन्न विषयमा छलफल भएको छ ।
आज मेची भन्सार कार्यालयको सभाहलमा ७२ औं अन्तर्राष्ट्रिय भन्सार दिवसको अवसरमा नाकामा हुने ओसारपसार र विभिन्न झनझटिलो समस्याका विषयमा उद्योगी–व्यवसायहरुसँग छलफल भएको हो ।
भारतको पानीट्याङकी कस्टम र मेची पुलदेखि भन्सारसम्म मालबाहक ट्याङकर, कन्टेनर, साना–ठुला सवारी साधन, सिटी रिक्साहरुको समस्या लगायतका विषयमा समाधान खोजी गरिदिन व्यवसायीहरुले आग्रह गरेका थिए ।
छलफलमा नेपाल प्लाइउड संघका केन्द्रीय अध्यक्ष होमप्रसाद घिमिरेले लक्ष्य हासिल गर्ने क्रममा भन्सारले थपिएको करले उद्योगी–व्यवसायीहरु मरमा परेको बताएका छन् ।
कार्यक्रममा मेची उद्योग वाणिज्य संघका संस्थापक अध्यक्ष पन्नालाल जैन, मेची पेट्रोलियम डिलर्स एशोसिएशनका अध्यक्ष नविन कोइराला, चेम्बर अफ कमर्स मेचीनगरकी अध्यक्ष रुक्मिणा पोखरेल, नाइट चेस क्लव्बका अध्यक्ष विश्वविजय घिमिरे, व्यवसायीहरु श्याम न्यौपाने, नारायण बस्नेत, सन्तोष खवास, गणेशकुमार खरेल लगायतले धारणा राखेको मेची उद्योग वाणिज्य संघका कार्यकारी निर्देशक गोपाल बस्नेतले बताए ।
उद्योगी–व्यवसायीले राखेको सुझावको मेची भन्सार कार्यालयका प्रमुख रामप्रसाद रेग्मीले जवाफ दिएका थिए । मेची भन्सार कार्यालय र मेची उद्योग वाणिज्य संघको संयुक्त आयोजना उक्त कार्यक्रम भएको थियो ।
मेची उद्योग वाणिज्य संघका अध्यक्ष खेमराज प्रसाईको अध्यक्षतामा भएको कार्यक्रमको स्वागत वरिष्ठ उपाध्यक्ष कपिल क्षेत्रीले र सञ्चालन महासचिव दिनेश शाक्यले गरेका थिए ।
Discussion about this post