काँकरभिट्टा, ५ फागुन । काँकरभिट्टाको एतिहासिक धार्मिक स्थलको रुपमा परिचित कालीखोलाको शिव पातालगंगा मन्दिरमा आइतबारदेखि श्रीमद्भागवत सप्ताह ज्ञान महायज्ञ सुरु हुँदैछ ।
मेचीनगर–६ स्थित शान्ति–रमाइलो गाउँको शिव पातालगंगा मन्दिर समिति र सद्गुरु मानव सेवा फाउण्डेशन मेचीनगर–३ को संयुक्त आयोजनामा आइतबारदेखि ७ दिने पुराण सुरु हुने भएको हो ।
आज मन्दिर परिसरमा समितिले पत्रकार सम्मेलन गरेर सो विषयमा जानकारी गराएको छ ।
सद्गुरु मानव सेवा फाउण्डेशनका अध्यक्ष आचार्य पण्डित मुकुन्द नेपालले मन्दिरको व्यवस्थापन तथा हात–खुट्टा, श्रवण शक्ति नभएका असक्त–अपाङगहरुलाई कृतिम हात–खुट्टा र ह्युल चियर सहयोगका लागि अक्षयकोष स्थापना गर्ने उदेश्यले पुराण सुरु गर्न लागिएको बताए ।
‘यसलाई हामीले अभियानको रुपमा लगेका छौँँ’ अध्यक्ष नेपालले भने–‘मेचीदेखि महाकालीसम्म यो अभियानलाई लान्छौँ । काँकरभिट्टाको पुराणपछि झापा र इलामको ६ ठाउँमा गरिनेछ । अभियान १५ वर्षदेखि निरन्तर रुपमा सक्रिय छ ।’
भोलिदेखि सुरु हुने पुराणको पहिलो दिन कलशयात्रा गरिने कार्यक्रम छ । मेची नदीको जल लिएर मन्दिरमा चढाएर पुराण विधिपूर्वक सुरु हुनेछ । पुराणको उद्घाटन मेचीनगर नगरपालिकाका मेयर गोपालचन्द्र बुढाथोकीले गर्नेछन् ।
एकहप्ताको पुराण आयोजना गर्न करिव ५ देखि ७ लाख रुपैयाँ खर्च लाग्ने अनुमान समितिले गरेको छ ।
सद्गुरु मानव सेवा फाउण्डेशनका सञ्चालक सचिन निरौलाले हात–खुट्टा नभएका, दुःखमा परेकाहरुको कृतिम हात–खुट्टा, ह्युललचियर र बैशाखीहरु उत्पादन गरेर उद्योग स्थापना गर्ने अभियानको लक्ष्य रहेको बताए ।
शिव पातालगंगा मन्दिर समितिका सदस्य राजु कार्कीले ०४५ सालको भुकम्पपछि अलिक ओझेलमा परेको एतिहासिक धार्मिक स्थलको पहिचान स्थापित गर्न पनि यो अभियानमा जोडेर पुराण आयोजना गरिएको बताए ।
०४५ सालअघि काँकरभिट्टाबासीले कालीखोलाको पातालगंगा मन्दिरमा पुजा गर्ने र पानी खाने ठाउँका रुपमा परिचित रहेको कार्कीको भनाई छ ।
शिव पातालगंगा मन्दिर समितिका संरक्षक शंकर भट्टराईले यहाँ नव ग्रहको मन्दिर र २२ धारा निर्माण गर्ने उदेश्य पनि रहेको जानकारी दिए ।
शिव पातालगंगा मन्दिर समितिका अध्यक्ष एवम् पुराण मुल आयोजक समितिका संयोजक प्रेमरत्न चुडालको अध्यक्षता र सञ्चालन पण्डित देवराज निरौलाले गरेका थिए ।
भिडियो पनि हेर्नुहोला ।
Discussion about this post