जीवन बचाइदिन चुनादेवी सुवेदीको अपिल

बिर्तामोड, ७ फागुन । आर्थिक अभावले पूर्ण रुपमा उपचार नपाएर हस्पिटलको वेडबाट बाहिरिन बाध्य भएकी चुनादेवी सुवेदीले सहयोग गरेर आफ्नो जीवन बचाइदिन अपिल गरेकी छ्न् ।

शल्यक्रिया गरेको देब्रे हातमा इन्फेक्सन हुँदा २० लाख भन्दा बढी खर्च भएपनि थप औंषधिसहित उपचारका लागि आर्थिक सहयोग जुटाइदिन सुवेदीले अपिल गरेकी हुन् ।

‘उपचार चलिरहेको थयो । हातको हड्डीमा इन्फेक्सन भएकाले उपचारमा संलग्न चिकित्सकले पनि नजान भनेको थियो, के गर्नु आफुलाई चिने जानेकाहरुले गरेको सहयोगले नपुगेर करिव १८ लाख ऋण नै गरिसके । त्यो रकमले नपुग्ने भएपछि ६ पटकसम्म शल्यक्रिया गरेको सिथिल शरीर लिएर हस्पिटल कक्षबाट आइतबारदेखि बाहिरे’, भाबुक हुँदै सुवेदीले भनिन् ।

इलामको देउमाई–२ स्थित कोठामा बस्दै आएकी सुवेदी गत साउन २६ गते शुक्रबार दिउँसो ढोकामा लगाएको पर्दा निकाल्न मुढामा चडेकी थिइन् । मुढामा खुट्टा चिप्लिएर लडेपछि उनी अचेत भइन् । रक्तपात अवस्थामा भुइमा लडेको देखेर छिमेकीले फिक्कल स्थित स्वास्थ्य केन्द्रमा पुर्याएका थिए ।

त्यहाँ सामान्य उपचारपछि झापाको बिर्तामोड स्थित बिर्तासिटी हस्पिटलमा पुग्दा उनको होस आएको थियो । भाँचिएको हात र आर्थिक अवस्था बुझेर ब्याण्डेज गरेपछि बिर्तासिटीले विराटनगर स्थित नोबेल हस्पिटलमा रेफर गरिदियो ।

‘नोबेल हस्पिटलले भाँचिएको हातमा शल्यक्रियापछि स्टिल राखेर उपचार गरेको थियो’, सुवेदीले भनिन्–‘उपचारपछि घर फर्के । ७ वर्षको छोरालाई पालनपोषण रेखदेख गर्नै पर्यो । पहाडको ठाँउमा जोगिएरै सकेको सामान्य काम गर्दै थिएँ । हस्पिटलले ३ महिनामा स्टिल खोल्न भनेको थियो । आर्थिक अभावले समयमै स्टिल खोल्न सकिँन ।’

हातमा सिलाई गरेको ठाउँमा फोका हुँदै घाउँ निस्किन थाल्यो । स्थानीयले गरेको आर्थिक सहयोगको भरमा नोबेल हस्पिटल पुगेर स्टिल निकाले पनि हातमा इन्फेक्सन बढेको थियो ।

स्टिल निकालेपछि घाउँ दुख्न थाल्यो भनेपछि बिर्तामोड स्थित मानव सेवा केन्द्रका प्रोपाइटरको दाजुभाईले झापाको बीएण्डसी हस्पिटलमा उपचारका लागि भर्ना गरिदिएका थिए । हस्पिटलमा एमआरआई गर्दा हातबाट इन्फेक्सन फैलिंदै शरीरमा पुगेको उपचारमा संलग्न डाक्टरको भनाई छ ।

उपचारका क्रममा माइती पक्ष, घरछिमेकी, नातागोता, विद्यालय, वडा कार्यालय वा चिनेजानेका सबैको सहयोग र ऋण गरेको २० लाख भन्दा बढी रकम पटक–पटक गरी हस्पिटल र मेडिकललाई बुझाएको उनको भनाई छ ।

उनका अनुसार स्वास्थ्योपचार पूर्ण पनि भएको छैन । मेरो उपचारमा आर्थिक सहयोग गरिदिन सबैलाई अनुरोध छ । ४ पटक शल्यक्रिया भयो । हातको हड्डीमा धेरै संक्रमण फैलिएकाले हड्डी खिइँएर सानो भएकाले कम्मरको हड्डी निकालेर नहाली नहुँने चिकित्सकले सल्लाह दिएका छन् । बाँचेर केही गर्ने योजना बुन्दाबुन्दै यो अवस्थामा पुगें ।

केही वर्षअघि भारत पलायन भएका चुनादेवीका श्रीमान् चन्द्रप्रसाद ढुंगेल हालसम्म सम्पर्कबिहिन छ्न् । ७ वर्षको छोरासँग भाडाको कोठामा गुजारा चलाउँदै आएकी चुनादेबीको माइतीतर्फ आर्थिक अवस्था कमजोर भएकै कारण सहयोगको यचना गरेको उनको भनाई छ ।

दुई वर्षअघि करार दरबन्दीमा स्थानीय कृष्ण शर्मा सेकेण्डरी स्कुलमा शिक्षण पेशा आवद्ध चुनादेबीलाई विद्यालयले २५ हजार र वडा कार्यालयले १० हजार आर्थिक सहयोग गरेको थियो ।

दैनिक १ हजार पर्ने एउटा ट्याबलेट र भारतीय रुपैयाँ ७२ सय पर्ने एउटा इन्जेक्सन निरन्तर ३ महिनासम्म खानु र लगाउनु पर्ने औषधि लेखिदिएको छ । औषधि किन्ने सामर्थय छैन । अब मैले कसरी जुटाउँनु ? प्रश्न गर्दै सबैले आर्थिक सहयोग गरी मलाई बचाइदिन अपिल गर्दछु ।

उनले एक्सेल डेभलपमेन्ट बैकको शाखा इलामको खाताको नाम चुनादेवी सुवेदीको एकाउन्ट नम्बर (००२०१२०००१५०७५०००००१) र (फोन पे नं.) ९८६९८५५१५० मा आर्थिक सहयोग गरिदिन आग्रह गरेकी छन् ।