विवादकाबीच मेचीनगरमा युवा संघको सपथ ग्रहण

मेचीनगर, ७ फागुन । राष्ट्रिय युवा संघ नेपाल मेचीनगर कमिटीको सपथ ग्रहण तथा प्रशिक्षण कार्यक्रम सम्पन्न भएको छ ।

सोमबार मेचीनगर–१० स्थित टाउन हलमा सम्पन्न कार्यक्रममा मेचीनगर कमिटीसंगै नगरका पन्ध्रवटै वडाका नवनिर्वाचित पदाधिकारी तथा सदस्यहरुलाई सपथ गराइएको हो ।

युवा संघ मेचीनगर कमिटी शुनिल राजवंशीको नेतृत्व रहेको छ । केही समयअघि मेचीनगरको पन्ध्रवटै वडा कमिटीसंगै राष्ट्रिय युवा संघ मेचीनगर कमिटी गठन भएको थियो ।

उनीहरुलाई आज नेकपा एमाले केन्द्रीय सल्लाहकार परिषद सदस्य तथा बागमतीका पूर्व प्रदेश प्रमुख विष्णु प्रसाईको प्रमुख आतिथ्यता रहेको थियो ।

कार्यक्रममा प्रमुख अतिथि प्रसाई, केन्द्रीय सल्लाहकार परिषद सदस्य भिम खवास, एमाले नेता तथा मेचीनगर नगरप्रमुख गोपालचन्द्र बुढाथोकी, केन्द्रीय सदस्य तथा मेचीनगर उपप्रमुख मीना पोखरेल उप्रेती, जिल्ला कमिटी सचिव शिव ढुंगेल, मेचीनगर अध्यक्ष राजु पोखरेल, राष्ट्रिय युवा संघ केन्द्रीय सचिव पर्वत भण्डारी, पूर्व सचिव राजु कार्की लगायतका नेतृत्वको सहभागिता रहेको थियो

यसैबीच उक्त सपथ ग्रहण कार्यक्रमको केहि युवा नेताहरुले सामाजिक सञ्जालमा विरोध गरेका छन् ।

राष्ट्रिय युवा संघ मेचीनगर कमिटी सचिवालय सदस्य एवम् वडा नम्बर २ का इन्चार्ज दिपेश लामाले फेसबुकमा यसरी स्टाटस लेखेका छन् –‘कथित राष्ट्रिय युवा संघको सपथ ग्रहण कार्यक्रम मनभावना भएको र विशुद्व गुटको कार्यक्रम भएकोले सम्पूर्ण न्यायप्रेमी युवा कमरेडहरुलाई सचेत गराउन चाहान्छौँ ।’

त्यसैगरी वडा नम्बर १ का इन्चार्ज एवम् नगर सचिवालय सदस्य सागर खड्का, वडा नम्बर २ का इन्चार्ज एवम् नगर सचिवालय सदस्य दिपेश लामा, वडा नम्बर ३ का इन्चार्ज एवम् नगर सचिवालय सदस्य मनोज सुब्बा, वडा नम्बर ५ का इन्चार्ज एवम् नगर सचिवालय सदस्य शैलेश श्रेष्ठ, वडा नम्बर ८ का इन्चार्ज एवम् नगर सचिवालय सदस्य सञ्जय माझी र वडा नम्बर १२ का इन्चार्ज एवम् नगर सचिवालय सदस्य सक्कु लामीछानेले राष्ट्रिय युवा संघ मेचीनगर कमिटीलाई संगठनको सर्वमान्य सिदान्तलाई लत्याउँदै गरेको सपथ ग्रहण तथा प्रशिक्षण कार्यक्रमको कुनै औचित्य नै नरहेको भन्दै ध्यानाकर्षणसहितको पत्र हस्ताक्षर गरेर बुझाएको वडा नम्बर १ का इन्चार्ज खड्काले बताए ।

उनका अनुसार विवादबीच सपथ ग्रहण तथा प्रशिक्षण कार्यक्रम आयोजना गरिएकोले त्यसको खुलेर खेद व्यक्त गर्दछौँ ।

उक्त कार्यक्रममा ८ वटा वडा सहभागी नभएको र १३ नम्बर वडा कमिटी समेतमा विवाद भएकोले सपथ ग्रहण स्वीकारै नभएको उनको दावी छ ।