चन्द्रगढी, ११ फागुन । झापामा प्रहरीको कमाण्ड समाल्न आउने प्रायः सबैजसो प्रहरी उपरीक्षक (एसपी) ले सुरुमा केहि नयाँ कुरा सार्वजनिक गर्ने प्रचलन बसेको छ ।
यसअघि झापा प्रहरीको कमाण्ड समाल्न आउने थुप्रै एसपीले जे गरे हालै झापा प्रहरीको कमाण्ड समाल्न आएका एसपी मिलन केसीले पनि सोही चलनको निरन्तरता दिएका छन् ।
उनले कमाण्ड समालेको लगभग ४ दिन पनि वितेको छैन । तर, सुरुमा नै ३ वटा महत्वपूर्ण काम गरेको उनको दावी छ ।
पहिलो झापाका विभिन्न ठाउँबाट चोरी भएका मोटरसाइकल र चोरी गर्ने व्यक्ति, दोस्रो प्रतिबन्धित लागूऔषध ब्राउन सुगर र तेस्रो विभिन्न मुद्वामा फरार अभियुक्त पक्राउ गरेको एसपी केसीको भनाई छ ।
उनका अनुसार ८ वटा मोटरसाइकल, मोटरसाइकल चोरीमा संलग्न मोरङ मिक्लाजुङ गाउँपालिका–६ निवासी हाल बिर्तामोड–६ बुट्टावारी बस्ने २७ वर्षका बालकुमार मगर, १०२ ग्राम ब्राउन सुगरसहित गौरीगञ्ज गाउँपालिका–३ का १९ वर्षीय गगन रिसिदेव र सोही ठाउँका २७ वर्षीय रविन पासवानलाई पक्राउ गरेको छ ।
चोरी भएका मोटरसाइकल ताप्लेजुङबाट बरामद गरी चोरीमा संलग्न व्यक्ति, ब्राउन सुगरसहित पक्राउ परेका २ जना व्यक्ति र फरार रहेका १८ जना व्यक्तिलाई झापा प्रहरीले आज सार्वजनिक गरेको छ ।
त्यस्तै बहुविवाह, लागूऔषध, सवारी ज्यान, चेक अनादर, कुटपिट, चोरी, अवैध वन पैदावर, ठगी, अभद्र व्यवहार र गाली बईजती मुद्वामा जिल्ला अदालतबाट फैसला भइ फरार रहेका १८ जना अभियुक्तहरुलाई पक्राउ गरिएको एसपी केसीले जानकारी दिए ।
भर्खरै झापाबाट सरुवा भएर काठमाडौँ गएका एसपी दुर्गाराज रेग्मीले सुरुमा कमाण्ड समाल्न आउदा जिल्लामा आत्माहत्या र लागूऔषधको अवस्था विकराल रहेको भन्दै नागरिक समाजको सहयोगमा न्युनिकरण गरेर लाने प्रतिवद्वता व्यक्त गरेका थिए ।
अहिले झापा प्रहरीको कमाण्ड समाल्न आएका एसपी केसीले विगतमा व्याजी (दुर्गा रेग्मी)ले गर्न बाँकी रहेका कामलाई निरन्तरता दिने बताए । उहाँकै पदचाप गरेर नयाँ केहि गर्न सकियो भने कोशिस गर्ने केसीको दावी छ ।
Discussion about this post