पर्यावरण जोगाउन साउथ एशियाका देशहरु एकजुट हुनुपर्छ : सागर धारा

मेचीनगर, १२ फागुन । भारत हैदरावादका वातावरण विज्ञ सागर धाराले जलवायु संकटको समाधानका लागि पर्यावरण जोगाउन साउथ एशियाका देशहरु एकजुट हुनु पर्ने बताएका छन् ।

शनिबार काँकरभिट्टा खानेपानीको सभाहलमा मेचीनगर नगरपालिकाले आयोजना गरेको पर्यावरण संरक्षण तथा कृषिमा देखिएका समस्या र समाधान विषयक अन्तरक्रिया कार्यक्रमका मुख्य वक्ता वातावरण विद धाराले सो कुरा बताएका हुन् ।

उनले वनजंगल मासिए, जीवजन्तु मरे भने वातावरण प्रदुषण हुन्छ जसले गर्दा मानव जातिलाई क्षति पुग्ने भएकाले उर्जा संरक्षणमा लाग्नु पर्ने सुझाव दिएका थिए ।

विश्वको वातावरण नै प्रदुषण पार्ने काम युरोपका ठुला शक्ति राष्ट्र देशहरुले गरेको आरोप उनको छ ।

उनका अनुसार विशेष गरेर अमेरिका, चीन, रुस, भारत, जोडन, अस्ट्रेलिया लगायतका देशहरुले विकासका नाममा कोइला, तेल र ग्यास उत्पादन गर्छन् । ७० प्रतिशत ग्यासले वातावरण प्रदुषण पारेका छन् । त्यस्तै एशियाका देशहरुले ३० प्रतिशत ग्यासले वातावरण प्रदुषण पारेको उनको दावी छ ।

ठुला–साना देशहरुले विकास गर्ने कि वातावरण प्रदुषण नियन्त्रण गर्ने भन्ने विषयमा अब बहस चलाउन आवश्यक भइसकेको धाराको बुझाई छ ।

उनले ठुला भनाउँदा शक्तिशाली देशहरुले गरेको यो गल्तीलाई सच्याउन साउथ एशियाका देशहरु एकजुट भएर दवाव दिन जरुरी रहेको बताए । उनका अनुसार साउथ एशियाका देशहरुको एशोसिएशन बनाएरअघि बढ्नु पर्छ ।

‘मानवमा उर्जा आउने जाने बराबरी छ’, घटबढ भए रोग लाग्छ । वायुमण्डलमा कार्वनडाइअक्साइड मात्र बढी भइरहेको छ । विश्वमा हाल ४ दशमलव २१ डिग्री सेल्सियस तापक्रम छ । यो भनेको १ दशमलव १ डिग्री सेल्सियस तापक्रम बढी हो । वातावरण प्रदुषण भएको छ । पर्यावरण र मानवका लागि समस्या हो । सन २०८० मा ५ डिग्री सेल्सियस तापक्रम पुग्ने अनुमान छ । त्यो बेलामा करडौँ मानव, जीवजन्तु लगायतको सर्वनाश हुने पक्का छ ।’

कार्यक्रमको अध्यक्षता गरेका मेचीनगर नगरपालिकाका मेयर गोपालचन्द्र बुढाथोकीले मानिसको विलासी जीवनका कारण विश्वको वातावरण भत्किदै गएकोले विनाश निम्ताइरहेका छौँ, वातावरणलाई चुनौती दिइरहेको दावी गरे ।

कार्यक्रमको सहजिकरण वातावरण संरक्षणका अभियन्ता जयधर्म आचार्यले गरेका थिए ।