पत्रकार भट्टराईकाे उपचारमा आर्थिक अभाव

मेचीनगर, २६ चैत । अनुहारमा मासु पलाएका पत्रकार सञ्जय भट्टराईको उपचारमा सहयाेग गर्न अपिल गरिएको छ ।

इलामको सूर्योदय–७ स्थित गोगने घर भएका २३ वर्षीय भट्टराई झापा अर्जुनधारा नगरपालिकाको मेरो रेडियोमा समाचार बाचक र कार्यक्रम प्रस्तोताको रुपमा कार्यरत छन् ।

बिर्तामोडको मनकामना कलेजमा स्नातक तह प्रथम वर्षमा पत्रकारिता अध्ययन गरिरहेका उनको दाहिने गाला, कान र चिउडोमा मासुको ठूलो लुर्को पलाएको छ ।

डेरामा बसेर अध्ययन र पत्रकारितालाई सँगसँगै अघि बढाइरहेका उनकाे मासुले अनुहार ढाकेका कारण हिँडडुल गर्न र खान समस्या भइरहेको छ भने कान र दाहिने आँखामा पनि समस्या भएको छ ।

मासु पलाउने समस्या जन्मजात भएको बताउँदै पत्रकार भट्टराईले धरानको वीपी कोइराला स्वाथ्य विज्ञान प्रतिष्ठान र बिर्तामोडको बीएन्डसी अस्पतालमा जचाउँदा चिकित्सकहरुले शल्यक्रिया गर्नुपर्ने सुझाव दिएको बताए ।

उपचारका लागि आर्थिक अभाव भएको उनले बताए ।

अरु मान्छे जस्तै हुन इच्छा भएको र रुपकै कारण धेरै कुरा गुमाएको बताउने भट्टराईले उपचारका लागि पहल गरिदिन अपिल गरेका छन् ।

हाम्रो अभियान नेपालका संयोजक नरेश मोहोराले उनको उपचारका लागि इजी केयर फाउण्डेशन मार्फत शुष्मा मेमोरियल अस्पताल काठमाडौंमा पहल भइरहेको बताए ।

भविष्यमा असल पत्रकार बनेर समाजसेवा गर्ने सपना साँच्नु भएको उनको बुवाआमा सामान्य कृषक छन् भने एउटा भाई वैदेशिक रोजगारीको सिलसिलामा मालद्विपमा छन् ।