झापा, २३ बैशाख । जनता समाजवादी पार्टी (जसपा) नेपालका अध्यक्ष उपेन्द्र यादव अमेरिकामै भएको बेलामा पार्टी विभाजित बनेको छ ।
वरिष्ठ नेता अशोक राईको नेतृत्वमा नयाँ पार्टीको रुपमा जनता समाजवादी पार्टि आयोगमा दर्ता भएको छ ।
जनता समाजवादी पार्टी मात्रै राख्ने गरी दर्ताको लागि आयोगमा निवेदन दिएको छ । प्रतिनिधिसभामा हाल जसपाका १२ सांसद छन् । तीमध्ये राईको पक्षमा ७ जना सांसद रहेका छन् ।
७ जना सांसदहरु अशोककुमार राई, नवलकिशोर साह, रञ्जु ठाकुर, हसिना खान, वीरेन्द्र महतो, सुशीला श्रेष्ठ र प्रदीप यादव रहेका छन् । पार्टीमा आफूहरुको पक्षमा बहुमत रहेको भन्दै निर्वाचन आयोगमा दाबी गरिएको छ ।
जसपामा एकाएक विभाजन आउनुको मुख्य कारण सत्ता समीकरण रहेको बुझिएको छ । गत फागुन २१ गते प्रचण्डले कांग्रेस नेतृत्वको गठबन्धन तोडेपछि कांग्रेसले वैकल्पिक गठबन्धनका लागि माधव नेपाललाई प्रधानमन्त्री बनाउन प्रस्ताव गरेका थिए ।
प्रतिनिधिसभामा नेपालका १० जना सांसद छन् । नेपाल ओलीसँग दूरी बढाउँदै कांग्रेस सभापति शेरबहादुर देउवासँग नजिक रहेका छन् ।
वैकल्पिक गठबन्धनमा कांग्रेसको ८८, राप्रपाको १४, जसपाको १२, एकीकृत समाजवादीको १०, जनमतको ६, नागरिक उन्मुक्ति र लोसपाका ४–४ जोड्दा १३८ सांसदको गणित थियो । तर, नेता राईको नेतृत्वमा ७ जना सांसदले पार्टी विभाजन गरेपछि वैकल्पिक गठबन्धनको सम्भावना टरेको छ ।
अध्यक्ष यादव नेपालसँग मिलेर प्रचण्ड सरकार ढाल्न लागेपछि पार्टी विभाजन भएको हो । अब यादवसँग ५ जना सांसद मात्रै छन् । जसपा विभाजनमा प्रधानमन्त्री प्रचण्ड र एमाले अध्यक्ष ओलीको रणनीती देखिन्छ ।
जसपा विभाजन गर्ने राई एमाले पृष्ठभूमिका हुन् । उनलाई धरानमा चुनाव जिताउन एमालेले सघाएको थियो ।
सरकारलाई स्थायित्व दिन आफूहरुले पार्टी विभाजनको कदम उठाएको वन मन्त्रीसमेत रहेका नवलकिशोर साहको दावी छ ।
अध्यक्ष यादवले यो सरकार ढाल्ने सूचना पाएपछि पार्टी विभाजन गर्नुभएको हो भन्ने जिज्ञासमा साहले भने, ‘सरकारलाई अस्थिर गर्ने गतिविधि चलिरहेको थियो । त्यसैले सरकारको पक्षमा यो निर्णय गरेका छौँ ।’
Discussion about this post