आर्थिक मन्दीले व्यवसायीहरु थाकिसके : प्रदेश प्रमुख खापुङ

मेचीनगर, २९ जेठ । कोशी प्रदेश प्रमुख परशुराम खापुङले देशको परिस्थितिलाई हेर्दा राजनीतिक हिसावले धेरै अपठेरो अवस्थामा ग्रुजिरहेको बताएका छन् ।

आज मेचीनगर–७ स्थित आयावारीमा सञ्चालित माइ वल्ड रिकन्डिशन एण्ड सर्भिस सेन्टरको प्रथम वार्षिकोत्सव तथा विद्युतिय सवारी समुद्घाटन गर्दै उनले उद्योगपति, पेशा व्यवसायीहरु आजित र थाकेको अवस्था सुनाएको बताए ।

‘बजार मन्दी छ’, प्रदेश प्रमुख खापुङले भने –‘वेरोजगारी र महंगीका कारण एसईई र प्लस टु पास गर्ने वितिक्कै देश छाड्ने नराम्रो वानी बनेको छ । आर्थिक मन्दीले बजार चलायमान छैन । उद्योगहरु अद्योगतितिर गएको अवस्था छ ।’

विद्युतिय सवारी साधानको उद्घाटन गर्दै उनले विद्युतिय गाडीको बिक्री वितरणबाट देशलाई आर्थिक विकासमा मद्दत पुग्ने बताए ।

विदेश भासिरहेको बेला यहाँका युवाहरु मिलेर महँगीको मारमा पनि स्वदेशमै उद्योग तथा व्यवसाय सञ्चालन हुनुले राम्रो सुखद सन्देश प्रवाह हुने उनको बुझाई छ ।

प्रदेश प्रमुख खापुङले लागूऔषधमा फसेका युवायुवतीहरुलाई स्थानीय सरकार, संघ–संस्था लगायत सबैपक्ष मिलेर निर्मूल पार्न सकिने बताए ।

कार्यक्रममा प्रदेश प्रमुख खापुङ, कोशी प्रदेशका पूर्वसांसद श्रीप्रसाद मैनाली, कोशी प्रदेश प्रहरी प्रमुख एवम् डीआईजी चन्द्रकुबेर खापुङ, ७ नम्बर वडाका वडाध्यक्ष प्रल्हादमणि ओली, नेपाली कांग्रेस झापाका उपसभापति एवम् व्यवसायी केशवराज पाण्डे, नेकपा एमालेका मेचीनगर अध्यक्ष राजु कार्की, नेकपा माओवादी केन्द्रका मेचीनगर अध्यक्ष राजन चिमरिया, नाटा कोशी प्रदेशका निवर्तमान अध्यक्ष उदयकुमार श्रेष्ठ, समाजसेवी डिल्लीराम घिमिरे लगायतले बोलेका थिए ।

कार्यक्रममा एभरेष्ट अटो प्रालिका प्रबन्ध निर्देशक मिलन लिम्बूले स्वागतसहित विद्युतिय सवारी साधानका बारेमा जानकारी दिएका थिए ।

सेन्टरमा विद्युतिय सवारी साधानमा साइकल, स्कुटी र टेम्पो बिक्रीमा राखिएको सञ्चालक नारायण चोङबाङले बताए ।

उनले ८५ हजारदेखि १ लाख ३० हजारसम्मका साईकल, एक लाख ५० हजारदेखि ३ लाख १८ हजारसम्मका स्कुटी र ८ लाख ४० हजार रुपैयाँ पर्ने टेम्पो रहेको जानकारी दिए ।

माइ वल्ड रिकन्डिशन एण्ड सर्भिस सेन्टरका कार्यकारी निर्देशक ओमप्रकाश खापुङको अध्यक्षतामा सम्पन्न कार्यक्रमको सञ्चालन पत्रकार भूमिका सुब्बाले गरेकी थिइन् ।