अग्नि आएपछि मेचीनगरको रूपरंगै फेरिँदै

मेचीनगर, २ साउन । प्रमुख प्रशासकीय अधिकृत अग्निप्रसाद अधिकारी आएको चार महिना नवित्तै मेचीनगर नगरपालिकाको रूपरंग फेरिन थालेको छ ।

नगरपालिका कार्यालयको जिर्ण बन्दै गएको भवनको मर्मत र रंग रोगन गर्ने काम भइरहेको छ । नगरपालिकाले भवनको रंग रोगनका लागि मेचीनगर–१४ को राइजिङ डोर्स कन्ट्रकन्सन कम्पनी प्रालिलाई २० लाख रूपैयाँमा यहि असार २ गते ठेक्का सम्झौता गरेको थियो ।

भवनको दोस्रो तलाको अग्रभागमा सेवाग्राहीलाई बस्न मिल्ने चौतारो समेत बन्ने भएको छ ।  प्रमुख प्रशासकीय अधिकृत अधिकारीले नगरपालिका भवनको गेटदेखि पूर्वपश्चिम राजमार्गसँग जोडिएको बाटोसम्म पीचसहितको व्युटिफिकेसन गरिने जानकारी दिए ।

‘सेवाग्राही वा पाहुनाहरू नगरपालिका कार्यालय पस्दै गर्दा मन प्रफुल्ल पारेर छिरुन’ अधिकारीले भने– ‘नगरपालिकामा रिसाएर आएका सेवाग्राही पनि खुशी भएर आफ्नो काम सकेर जाउन भन्ने उदेश्य हो ।’

उनका अनुसार भवन रंग रोगन, भवन परिसर र सडक निर्माणसहित व्युटिफिकेशनका लागि कुल ७० लाख बजेट छुट्टाइएको छ । कामहरु धमाधम भइरहेको छ ।

उनले भने–‘अब नगरपालिकामा सेवाग्राहीलाई चेकलेस पेमेन्टको व्यवस्था हुन्छ । लेखामा प्रक्रिया पुरा गरेर आएका डकुमेन्टको जाँच गरेर ठिक छ भने सेवाग्राहीको बैँक खातामा सिधै पैसा पठाइन्छ । अन्य पालिकामा जस्तो छ । यहाँ पनि अब चाँडै त्यस्तै लागू हुन्छ । सेवाग्राहीलाई अब झनझट दिदैनौँ ।’

नगरपालिका आउने सेवाग्राहीहरूले काम सहजरूपमा हुन थालेको बताएका छन् । अधिकारी आएपछि नगरपालिका कार्यालय र वडा कार्यालयबाट प्रवाह हुने सेवाको कार्यसम्पादन आशलाग्दो हुन थालेको छ ।

२० वर्ष विभिन्न जिल्लाको स्थानीय तहमा काम गरेका झापा गौरादहका अधिकारी अनुभवी हुन् । उनी मेचीनगर गत चैत महिनाको अन्तिम साता आएका हुन् । उनी यसअघि उर्लाबारी नगरपालिकामा थिए । त्यहाँ उनको कार्यसम्पादन लोभलाग्दो रहेको जानकारहरूले बताएका छन् ।

अधिकारीले मेयर गोपालचन्द्र बुढाथोकी, उपमेयर मीना पोखरेल उप्रेती, वडाध्यक्ष र कर्मचारीहरूप्रति मिलेर काम गरिरहेको नगरपालिका कार्यालय भित्रै चर्चा भइरहेको छ । नगरपालिका आएका यसअघिका प्रमुख प्रशासकीय अधिकृतहरू टिक्नै नसकेर छोटो समयमा हिड्ने गरेका थिए ।

मेचीनगर–१० का वडाध्यक्ष नारायण खनालले अहिलेका प्रमुख प्रशासकीय अधिकृत लामो समयदेखि स्थानीय तहमा बसेकाले दक्ष हुनु हुन्छ, जनप्रतिनिधि, कर्मचारी र सबैसँग उहाँको व्यवहार राम्रो रहेको बताए ।

अधिकारीले नगरपालिका कार्यालयको रूपरंग फेरे जसरी नै समग्र मेचनगरबासीको पनि मुहारमा खुशी ल्याउन सफल हुन्छन् भन्ने अपेक्षा नागरिकहरूको छ ।

‘उहाँ कस्तो हुनु हुन्छ भन्ने कुरा भर्खरै सम्पन्न सार्वजनिक सुनुवाई कार्यक्रममा पनि थाहा पाए’ वडा नम्बर ३ का एक स्थनीयले भने–‘नगरपालिका जाँदा होस् वा वडा कार्यालय अहिले हुने काम र कागजात पुगेका रोकिदैनन् । मेरो काम पनि रोकिएन ।’

गत आ.व.२०८०÷८१ मा पुँजीगत खर्च ६÷७ प्रतिशत मात्र थियो तर, ४ महिना यता ७३ प्रतिशत पुँजीगत खर्च भएको छ । चालु आर्थिक वर्षको २०८१÷८२ मा अब डिजिटल प्रणाली लागू हुने र जनताले सहजरुपमा सेवा पाउने गरी योजनाहरु कार्यान्वयनमा लाने नगरपालिकाको लक्ष्य रहेको छ ।

अधिकारीका अनुसार मेचीनगरलाई राम्रो बनाउन अहिले सम्मको स्थानीय तहको अनुभवलाई प्रयोगमा ल्याउने छु । त्यसका लागि सबैको साथ र सहयोगको खाँचो छ ।

।। अर्जुन कार्की ।।