बिर्तामोड, ११ साउन । बिर्तामोड नगरपालिका-९ स्थित भुसुडी खोलामा ट्रस पुल निर्माण भएकाे छ ।
काेशी प्रदेश भौतिक पूर्वाधार विकास मन्त्रालयको २७ लाख ५८ हजार आठ सय एकाउन्न रुपैयाँ (भ्याट, पि.एसआईटम) सहितको लगानीमा १६ मिटर लम्बाई तथा १.६ मिटर चौडाईको पुल निर्माण भएको हो ।
वडा नम्बर ९ का वडाअध्यक्ष हरिप्रसाद चौलागाईले पुल बनेपछि सहिद लक्ष्मी प्राथमिक विद्यालय र दुर्गा माध्यमिक विद्यालयमा अध्ययनरत विद्यार्थीलाई आवत जावतमा सहज भएको बताए ।
उनले वर्खामा वारी पारी गर्न बाँसको फड्के लगाउने गरेको भएपनि यस वर्षदेखि त्यो समस्या हटेर गएकाे बताए । प्रदेश सांसद कमला थापा मगरको पहलमा पुलको बजेट विनियोजन भएको बताइएको छ ।
पुल निर्माणको काम सम्पन्न भएकोले चेकजाँच तथा अनुगमन गरी चाँडै हस्तान्तरण गरिने ठेकेदार कम्पनी आस्था निर्माण सेवा सुनसरीका प्रतिनिधि लिफाङ लिम्बुले जानकारी दिए ।
यस पुलबाट एक सय ७५ घरधुरी प्रत्यक्षरुपमा लाभान्वित हुने भएका छन् । ट्रस पुल बनेपछि विशेष गरेर विद्यार्थी र स्थानीयबासी खुशी भएका छन् ।
पुल नहुँदा सतालसिङ र डाँडागाउँ टोलका स्थानीयले वर्षौदेखि वारीपारी गर्न समस्या भोग्दै आएका थिए ।
Discussion about this post