बिर्तामोड, १६ साउन । पत्रकार टिकाराम नेतिले बिर्तामोडको प्रभु बैंकको शाखामा मुद्दति बचत गरेको आफ्नो परिवारको एक करोड १७ लाख बैंकबाट गायव भएको बताएका छन् ।
केही समयअघि नेति आफ्नो पत्नीसहित अमेरिका भ्रमणमा गएका थिए । अमेरिका जानु केहि दिनअघि उनले पत्नी मञ्जुकुमारी नेपालको नाममा उक्त रकम बैंकको मुद्दति खातामा ६ महिनाका लागि बचत गरेका थिए ।
मुद्दति बचतको अवधि पूरा (परिपक्व) भएपछि बैंक जाँदा आफ्नो खातामा रकम नभएको उनले आज पत्रकार सम्मेलनमा जानकारी गराए ।
‘हामीले एक करोड १९ लाख फिक्स्ड डिपोजिट गरेका थियौं,’ उनले भने–‘अहिले हेर्दा खातामा २ लाख मात्र रहेको पाइयो ।’
उनले बैंक र प्रहरीमा उजुरी दिँदै आफ्नो बचत फिर्ताको माग गरेका छन् । प्रभ बैंकका शाखा प्रबन्धक गणेशबहादुर बरालले यस विषयमा खोजविन गर्न छानविन समिति बनाएको जानकारी दिएको पीडित नेतिले सुनाए ।
सूर्योदय टेलिभिजनमा कार्यरत पत्रकार नेतिले बैंकले गैरजिम्मेवार र गम्भीर लापरवाहीपूर्ण व्यवहार देखाएको गुनासो गरे ।
श्रोतका अनुसार प्रभु बैंक बिर्तामोड शाखाका बजार व्यवस्थापक चन्द्रगढी निवासी प्रमोद सिटौला फरार रहेको बताइएको छ ।
Discussion about this post