भद्रपुर, २७ साउन । ओमसाई पाथिभरा अस्पताल भद्रपुरले डीअक्सीराइबो न्यूक्लिक एसीड (डीएनए) परीक्षण सुरु गरेको छ ।
‘स्वस्थकर जीवनशैली बिताउन डीएनए टेष्ट’ भन्ने मुख्य उदेश्यका साथ ओमसाई पाथिभरा अस्पतालले डीएनए परीक्षणको व्यवस्था गरेको छ ।
शनिबार ओमसाई पाथिभरा अस्पतालले भदपुर स्थित डे ग्लोको सभाहलमा जनप्रतिनिधी, स्वास्थ्यकर्मी, शिक्षासेवी, बौद्धिक व्यक्तित्व, पत्रकार, व्यवसायी लगायतको उपस्थितिमा डीएनए परीक्षण सुरु भएको जानकारी गराएको हो ।
अस्पतालका अध्यक्ष दिपक पोखरेलले नेपालमै निजीस्तरबाट पहिलो पटक डीएनएकोे परीक्षण सेवा सुरु गरिएको बताए ।
कार्यक्रममा डीएनए टेष्टका विज्ञ डा. आश्विन मौर्यले डीएनए परीक्षणबाट भविश्यमा मानिसलाई कुन रोग लाग्ने संभावना छ, त्यसबाट बच्न कस्तो खानपान र जीवनशैली अपनाउनु पर्छ, रोग लागेमा कुन औषधि प्रयोग गर्ने, त्यसबाट बच्न के गर्नु पर्छ लगायतका बारेमा प्रष्ट पारेका थिए ।
डा.मौर्यले डीएनए परीक्षणबाट रिलेसनको जानकारी दिने, एउटा व्यक्तिको १८ प्यानलमा १३१ प्रकारका परीक्षण हुने भएकोले यो एकपटक गरेपछि जीवनभरका लागि काम लाग्ने बताए ।
जीव, वनस्पति र भाइरसहरुको वंशाणुगत गुण बोक्ने एक विशिष्ट प्रकारको डीएनएले वृद्वि, विकास, मर्मत, सुधार, प्रजनन लगायतका थुप्रै सांकेतिक वंशाणुगत विवरणहरु संग्रहित गर्छ ।
यो अणुले शरीरको संरचना बनाउन महत्वपूर्ण भूमिका खेल्ने गर्छ । शरीरका अंगहर, आँखा, छाला, कपाल, रंग, आकार, तौल लगायतको निर्धारण पनि यसैले गर्छ ।
डीएनए परीक्षणबाट मानसिक क्षमताको विकास, मान्छेको डाइट, जीवनशैली, व्यायाम, क्यारियर, औषधि, रोग निदानका लागि जानकारी पाइने भएकोले महत्वपूर्ण हुने उनको भनाई छ ।
अस्पतालका अनुसार स्वाब दिएर डीएन परीक्षण गर्न एक हप्ता लाग्नेछ । रिपोर्ट आउन कम्तीमा ३ हप्ता लाग्ने छ । डीएनए परीक्षणको मेसिन महंगो भएकोले अस्पतालले प्रति व्यक्ति २५ हजार रुपैयाँ लाग्ने बताएको छ ।
अस्पताल अन्तरगतको टाइम्स फर्मा इनटरप्राइजेज पशुपति भिजन काठमाडौँले डीएनए परीक्षणका लागि एक हजार वटा किटहरु सुरक्षीत राखेको प्रबन्ध निर्देशक बालकुमार पोखरेल (साईराम)ले बताए ।
हाल अस्पतालमा १०० वटा किटहरु परीक्षणका लागि तयारी अवस्थामा रहेको उनले जानकारी दिए ।
कार्यक्रमको सञ्चालन अस्पतालका प्रशासन प्रमुख दिप पौडेलले गरेका थिए ।
Discussion about this post