काँकरभिट्टा, १४ भदौ । बाहुनडाँगी जेसीजको १४ औँ स्थापना दिवसको अवसरमा काँकरभिट्टामा आयोजित वतृक्त्व कला प्रतियोगितामा धुलाबारी माध्यमिक विद्यालयकी दिव्या राय प्रथम भएकी छन् ।
आज काँकरभिट्टा खानेपानी कार्यालयको सभाहलमा मनबहादुर बानियाँ क्षेत्री स्मृति प्रथम मेचीनगरस्तरीय अन्तरमावि वतृक्त्व कला प्रतियोगितामा उनी प्रथम भएकी हुन् । रायले नगद ७ हजार, प्रमाण पत्र र ट्रफी हात पारिन् ।
त्यस्तै धुलाबारीकै हिमालयन इङ्लिस एकाडेमीकी विद्या बुढाथोकी दोस्रो भएकी छन् ।
आदर्श मावि ईटाभट्टाका विकास गौतम तेस्रो र शहिद दशरथ चन्द मावि चारआलीकी विअसा बराल सान्त्वना भइन् । उनीहरुले क्रमशः नगद ५ हजार, ३ हजार र १ हजारसहित प्रमाण पत्र प्राप्त गरेका थिए ।
विजेता विद्यार्थीलाई प्रमुख अतिथि मेचीनगर नगरपालिकाका शिक्षा शाखा प्रमुख एवम् उपसचिव होमनाथ भण्डारी, बानियाँ बन्धु समाजका केन्द्रीय सल्लाहकार हरिचरण बानियाँ लगायतले पुरस्कार वितरण गरेका थिए ।
विजेताले आगामी असोज ११ र १२ गते धुलाबारीमा हुने नेपाल जेसीजको क्षेत्र क सम्मेलनमा सहभागी बन्न पाउने छन् ।
प्रतियोगितामा प्रथम भएकी विद्यार्थी रायले राष्ट्रिय वक्तृत्वकला प्रतियोगितामा सहभागी बन्न पाउने बाहुनडाँगी जेसीजका अध्यक्ष देवु बानियाँले बताए ।
प्रतियोगिताको प्रमुख निर्णायकमा काँकरभिट्टा बहुमुखी क्याम्पसका प्राध्यापक हेमकुमार खड्का, निर्णायक सदस्यमा एम्नेष्टी इन्टरनेशनलका केन्द्रीय उपाध्यक्ष केशव पोखरेल र कन्काई क्याम्पसका प्राध्यापक शेरबहादुर बानियाँ रहेका थिए ।
कार्यक्रममा मेचीनगरका कक्षा–११ र १२ का विद्यार्थीहरुलाई मात्र प्रतियोगितामा सहभागिता गराइएको थियो ।प्रतियोगितामा नगरका ८ वटा सामुदायिक तथा संस्थागत विद्यालयका विद्यार्थीहरुको सहभागिता रहेको थियो ।
कार्यक्रममा प्रमुख अतिथि उपसचिव भण्डारीले विद्यार्थीहरुको प्रतिभा प्रस्फुटनमा जेसीजले गरेको योगदानको खुलेरै प्रशंसा गरेका थिए ।
उनले विद्यार्थीको प्रतिभा प्रस्फुटन गराउन विद्यालयले अवसर प्रदान गर्दै आवश्यक तयारी गराउनु पर्नेमा जोड दिएका थिए ।
कार्यक्रममा प्रमुख अतिथि भण्डारी, बाँनिया बन्धु समाजका केन्द्रीय सल्लाहकार बानियाँ, धुलावारी जेसीजका पूर्व अध्यक्ष केशव पौडेल, सामाजिक अभियन्ता उद्धव बानियाँ, मेची उद्योग वाणिज्य संघका सदस्य सन्तोष खवास लगायतले शुभकामना मन्तब्य राखेका थिए ।
दिवंगत मनबहादुर बानियाँको स्मृतिमा भारतको आसम निवासी छोराहरु मुक्ति र निलबहादुर बानियाँ क्षेत्रीद्वारा संरक्षित प्रतियोगिता आयोजना गरिएको थियो ।
बाहुनडाँगी जेसीज वर्ष २०२४ का अध्यक्ष देवु बानियाँको अध्यक्षतामा सम्पन्न प्रतियोगिताको स्वागत कार्यकरिणी उपाध्यक्ष एवम् कार्यक्रम संयोजक शुष्मा मिश्र, आस्था वाचन कोषाध्यक्ष नित्यानन्द चम्लगाईँले गरेका थिए ।
कार्यक्रमको सञ्चालन महासचिव कौशल उप्रेती र प्रेस संयोजक जीआर धितालले संयुक्तरुपमा गरेका थिए ।
तेलपानीमा आँखा शिविर
यसैबीच बाहुनडाँगी जेसीजले शुक्रबार नै मेचीनगर–३, स्थित जनता मावि तेलपानीमा निःशुल्क आँखा शिविर सञ्चालन गरेको छ ।
शिविरमा ४ सय भन्दा बढीले आँखा जाँच गराएको शिविरका संयोजक बाहुनडाँगी जेसीजका थिम डाइरेक्टर दिवश पौडेलले बताए ।
बाहुनडाँगी जेसीजले यो वर्ष ४५ वटा कार्यक्रम सम्पन्न गरिसकेको कार्यक्रम संयोजक सामुल रायले जानकारी दिए ।
Discussion about this post