खुल्ला दौड प्रतियोगिता : पुरुषतर्फ याङदेव र महिलातर्फ संगीता प्रथम

मेचीनगर, २२ भदौ । नेकपा एमाले वडा कमिटी मेचीनगर–१५ ले आयोजना गरेको खुल्ला दौड प्रतियोगितामा पुरुषतर्फ याङदेव राई र महिलातर्फ संगीता हेमरम प्रथम भएका छन् ।

आज एमाले १५ नम्बर वडा कमिटीले आयोजना गरेको निलकोठीदेखि धुलाबारी क्याम्पस सम्मको ६ किलोमिटर खुल्ला दौड प्रतियोगितामा पुरुषतर्फ राई र महिलातर्फ हेमरम प्रथम भएका हुन् ।

उनीहरुलाई नगद जनही ५ हजार पुरस्कार र प्रमाणपत्र प्रदान गरिएको वडा कमिटी अध्यक्ष चेतन विष्टले जानकारी दिए । विहान ७ वजे उक्त दौड प्रतियोगिता सुरु भएको थियो ।

प्रतियोगितामा जम्मा ५३ जनामा ७ जना महिला सहभागी भएका थिए । पुरुषतर्फ याङदेव राई प्रथम, बाबुलाल हेमरम दोस्रो र शनिराम हेमरम तेस्रो भए ।

त्यस्तै महिलातर्फ रेजीना हेमरम दोस्रो र रत्ना महला तेस्रो भइन् । दोस्रो र तेस्रो हुनेलाई क्रमशः ४ हजार र ३ हजार रुपैयाँ पुरस्कार र प्रमाणपत्र प्रदान गरिएको अध्यक्ष विष्टले बताए ।

पुरुषतर्फ चौँथो, पाँचौ, छैठौँ, सातौँ, आठौँ, नवौँ र दशौँ हुने क्रमशः अमन चौधरी, अर्जुन वस्नेत, गोविन्द राना मगर, सुरेन मुर्मु, सुजन सोरेन, उदय विश्वकर्मा र निरज यादवलाई जनही नगद ५ सय प्रदान गरिएको जनाएको छ ।

महिलातर्फ चौँथो, पाँचौ, छैठौँ र सातौँ हुनेलाई पनि जनही नगद ५ सय प्रदान गरिएको थियो ।

कार्यक्रममा एमालेकी केन्द्रीय सदस्य मीना पोखरेल उप्रेती, कोशी प्रदेश कमिटी सदस्य देवकुमार राई, जिल्ला सदस्यहरु राजु पोखरेल, कृष्ण कनाल, कुष्मीकुमारी चौधरी, मेचीनगर अध्यक्ष राजु कार्की, उपाध्यक्ष कञ्चनकुमार तामाङ, सचिव सागर ओली, अनेमसंघ मेचीनगर अध्यक्ष हेमा सिटौला लगायतको उपस्थिति रहेको थियो ।