।। अर्जुन कार्की ।।
मेचीनगर, १३ असोज । संघीय सरकारका भौतिक पूर्वाधार तथा यातायात मन्त्री देवेन्द दाहालले मेचीनगर नगरपालिका–१ स्थित गाडागल्लीमा निर्माणधिन मदन भण्डारी राजमार्गको प्रत्यक्ष निरीक्षण गरेका छन् ।
शनिबार वडा नम्बर १ को कार्यालयको सभाहलमा आयोजित कार्यक्रममा मन्त्री दाहाललाई स्थानीय सरकारले मेचीनगरका मेची कोरिडोर, सडक, हात्ती, राहत, सुरक्षा, पुल, रेलवेको मुआव्जा लगायतका विषयमा ज्ञापनपत्र बुझाएका थिए । उक्त ज्ञापन पत्र मन्त्री दाहाललाई मेचीनगर नगरपालिकाकी उपमेयर मीना पोखरेल (उप्रेती)ले बुझाएकी हुन् ।
ज्ञापनपत्र बुझ्दै मन्त्री दाहालले यसपटकको बजेटमा समावेश गर्न सकिएन ढिलो भयो, आगामी बजेटमा क्रमागतरुपमा समावेश गरेर लाने प्रतिबद्वता व्यक्त गरेका थिए । उनले देशभरिका १४ हजार किलोमिटर सडक मध्ये साढे ४ हजार किलोमिटर सडक निर्माणधिन अवस्थामा रहेका बताए ।
देशका चार वटा बाटाहरु पूर्वपश्चिम राजमार्ग, लोकमार्ग, मध्ये पहाडी राजमार्ग र मदन भण्डारी राजमार्गको काम तिब्रगतिमा भइरहेको मन्त्री दाहाले बताए । भौतिक पूर्वाधार तथा यातायात मन्त्रालय मार्फत रहेका यातायात विभाग, सडक विभाग, रेलवे विभाग र पानी जहाज कार्यालयले आ–आफ्नो क्षेत्रमा काम गरिरहेको बताइएको छ ।
मन्त्रीका अनुसार रेलवेमार्फत छिमेकी देशहरु चिन, भुटान, बंगलादेश र भारतसँग जोडिएर विकासको काम गर्न करिव १५ खर्व रुपैयाँ लगानी गर्नु पर्ने आवश्यकता देखिएको छ ।
‘रेलवेका लागि रोक्का गरिएका जनताका जग्गाहरुको मुआव्जा दिन प्रयास भइरहेको छ’, मन्त्री दाहालले भने–‘मुआव्जा दिनु पर्यो कि जग्गा फिर्ता गर्नु पर्छ । त्यसका लागि अब चाँडै निर्णयमा पुग्ने छौँ ।’
रेलवे जग्गाका पीडितहरुका लागि मुआव्जा दिन भनेर केन्द्रबाट जिल्ला प्रसाशन कार्यालय झापामा ८८ करोड रुपैयाँ आएको बताइएको छ । मन्त्री दाहालका अनुसार १२ सय किलोमिटर निर्माणधिन मदन भण्डारी राजमार्गको ८०÷८२ प्रतिशत काम सम्पन्न भइसकेको छ ।
नेकपा एमाले र नेपाली कांग्रेसको गठबन्धन सरकार आएपछि जनतामा आशा पलाएको मन्त्री दाहालको भनाई छ । उनले सरकार ढाल्ने र बनाउने खेलमा मात्र लागेको तेस्रो दललाई पाँखा लगाएर देशमा स्थायी सरकारको परिकल्पना गरिएको दावी गरे ।
मेचीनगर–१ का वडाध्यक्ष रामबहादुर राईले सञ्चालन गरेको कार्यक्रममा नेकपा एमालेका केन्द्रीय सदस्य रविन कोइराला, केन्द्रीय सदस्य एवम् मेचीनगरकी उपमेयर उप्रेती लगायतले नगरका समस्या र समाधानका बारेमा उठान गरेका थिए ।
कार्यक्रममा नेकपा एमालेका नेताहरु विष्णु प्रसाई, हरिचरण बानियाँ, श्रीप्रसाद मैनाली, चिन्तन पाठक, जिल्ला अध्यक्ष प्रेम गिरी, कोशी प्रदेश सदस्य देवकुमार राई, जिल्ला सदस्य राजु पोखरेल, कृष्ण कनाल, सञ्जु ढुंगेल, नगर अध्यक्ष राजु कार्की, कोशी प्रदेशका सांसद गोपाल तामाङ, नेपाली कांग्रेसका कोशी प्रदेश सदस्य विमल आचार्य लगायत एमालेका नेता तथा कार्यकर्ताहरुको उपस्थिति रहेको थियो ।
भिडियो पनि हेर्नुहोला ।
भिडियो हेर्नुहोला ।
Discussion about this post