कोशीमा बाढीको वितण्डा : १७ जनाको ज्यान गयो

झापा, १३ असोज । चार दिनदेखि निरन्तर परेको वर्षाका कारण कोशी प्रदेशमा बाढी, पहिरो, डुबान तथा प्राकृतिक विपद्का घटनामा परी १७ जनाको ज्यान गएको छ ।

उक्त घटनामा परी देशभरि ज्यान गुमाउनेको संख्या १३२ पुगेको छ ।

गृह मन्त्रालयका अनुसार हालसम्म काठमाडौं उपत्यकामा ६८ जना, बागम्ती प्रदेशमा ४५ जना, कोशी प्रदेशमा १७ जना र मधेश प्रदेशमा २ जनाको मृत्यु भएको छ ।

यस्तै, विपद्का घटनामा परी ६४ जना बेपत्ता र ६१ जना घाइते भएका छन् । सुरक्षाकर्मीको सक्रियताका कारण हालसम्म देशभरबाट ३ हजार ६२६ जनाको सकुशल उद्दार गरिएको मन्त्रालयको भनाई छ । विपद्का कारण राजमार्ग अवरुद्ध रहेका सडक सुचारु गर्न सबै संयन्त्रहरु परिचालन गरिएको गृह मन्त्रालयले जनाएको छ ।

यसैबीच नेकपा एमाले कोशी प्रदेशका इन्चार्ज एवम् स्थायी कमिटी सदस्य शेरधन राई र कोशी प्रदेश अध्यक्ष घनश्याम खतिवडाले आज एक विज्ञप्ति जारी गरेर बाढी, पहिरो र डुबानले मानविय र धनजनको क्षतिप्रति चिन्ता व्यक्त गरेका छन् । मानविय क्षतिप्रति गहिरो दुःख व्यक्त गर्दै मृतकहरुप्रति भावपूर्ण श्रद्वाञ्जली अर्पण र परिवारजनप्रति समवेदना व्यक्त गरेका छन् ।

विज्ञप्तिमा मृतकका परिवारजनलाई उद्वार, राहत, घाइतेको उपचार र पुनस्र्थापना गराउन स्थानीय, प्रदेश र संघीय सरकारलाई ध्यानाकर्षण गराउने उल्लेख छ ।

विपद्को बेलामा उद्वार, राहत तथा पुनस्र्थापना कार्यमा उच्च सर्तकतासाथ सक्रियपूर्वक जुट्न कोशी प्रदेशका सबै जिल्ला कमिटी, नेता–कार्यकर्ता र पार्टी पंक्तिलाई आव्हान गरेको छ । त्यस्तै उद्वार, राहत तथा पुनस्र्थापना कार्यमा जुट्न तीन तहकै सरकार, राजनीतिक दल, संघ–संस्था, नीजि क्षेत्र र आम नागरिकहरुलाई अपिल गरिएको छ ।

केशी प्रदेशमा मानविय क्षतिको विवरण अनुसार पाँचथरमा ९ जना, इलाममा १ जना, धनकुटामा २ जना र सोलुखुम्बुमा ५ जना गरी १७ जनाको ज्यान गएको छ । त्यस्तै वेपत्ता र घाइते हुनेमा पाँचथरमा ४ जना र झापामा ३ जना गरी ७ जना वेपत्ता तथा विभिन्न जिल्लामा दर्जनौँ घाइते भएका छन् ।

उदयपुरको रौता र खोटाङको खोटेहाङ जोड्ने सुनकोशी नदीमा रहेको फोक्सिङटार पक्की पुल, पाँचथरको फिदिम हेवा खोलाको बेलिब्रिज, इलाम माइखोलाको पक्की पुल पुरै बगाउनुको साथै भोजपुर र उदयपुर जोड्ने चूहार पक्की पुल, इलाममा ३ वटा पक्की पुलमा गम्भीर क्षति पुगेको छ ।

यसैगरी, खोटाङ–उदयपुर जोड्ने धाप्लाङ्गाट झोलेङ्गे पुल, भोजपुर चूहारको झोलेङ्गे पुल, जोगेपाथरको झोलेङ्गे पुल, खोटाङको ४ वटा झोलेङ्गे पुल, ओखलढुंगाको २ वटा झोलेङ्गे पुलमा समेत क्षति भएको छ भने साना–ठुला सडकहरु भत्किएका कारण आवत जावतमा समस्या भएको छ ।