विदेशबाट फर्किएका युवाहरुका विषयमा छलफल

मेचीनगर, १६ वैशाख । नेपाल उद्योग बाणिज्य महासंघ कोशी प्रदेश समितिले वैदेशिक रोजगारबाट फर्किएर काम नपाइरहेका युवाहरुको अवस्था बुझ्न थालेको छ ।

बुधबार मेचीनगर नगरपालिकाको सभाहलमा महासंघ प्रदेश समितिले आयोजना गरेको स्थानीय तह स्तरीय समन्वय वैठकमा विदेशबाट फर्किएरका युवाहरुलाई कसरी काममा लगाउन समिन्छ भन्ने विषयमा उद्योगी–व्यवसायीहरुबीच छलफल भएको थियो ।

नगरप्रमुख गोपालचन्द्र बुढाथोकीको प्रमुख आतिथ्यतामा सम्पन्न भएको कार्यक्रमको अध्यक्षता महासंघ प्रदेश समितिका उपाध्यक्ष ऋषिराज तिम्सिनाको रहेको थियो ।

प्रमुख अतिथि नगरप्रमुख बुढाथोकीले स्थानीय तहमा सञ्चालित विदेशबाट फर्किएर आएका व्यक्तिहरुको पुनःएकीकरण परियोजना (रेमी) ले नगरमा त्यो काम गरिरहेको बताए ।

नगरभित्रका उद्योगी–व्यवसायीहरुले विदेशबाट फर्किएका युवाहरुको पहिचान गरेर रोजगारका लागि रेमीमार्फत सहजीकरण गरिने उनको भनाई छ ।

छलफलमा नेपाल उद्योग बाणिज्य महासंघका केन्द्रीय सदस्य नरेन्द्रकुमार खड्का, मेची उद्योग वाणिज्य संघका वरिष्ठ उपाध्यक्ष किशोर क्षेत्री (कपिल), नेपाल भेनियर उत्पादक महासंघका अध्यक्ष श्याम न्यौपाने, नेपाल अलैंची व्यवसायी महासंघका कार्यकारी निर्देशक अनिल ढुंगाना लगायतले विदेशबाट फर्किएर काम नपाएर अलपत्र परेका युवाहरुलाई संरक्षण गर्ने दायित्व हाम्रो पनि रहेको बताएका थिए ।

व्यवसायीहरुका अनुसार पहिलो कुरा त्यसका लागि स्थानीय, प्रदेश र केन्द्र सरकारले उद्योगी–व्यवसायीहरुको व्यवसाय गर्ने बातावरण बनाइदिनु पर्छ । सुरक्षित, शान्तिपूर्ण र न्ययोचित कर प्रणाली भए वेरोजगार युवाहरुलाई काममा लगाउन सकिने छ ।

छलफलमा महासंघ कोशीका कार्यकारी निर्देशक श्याम भण्डारी, रेमी परियोजना कोशीकी कार्यकारी अधिकृत रीता बिश्वास, रेमीको मेचीनगरका रोजगार परामर्शकर्ता फडिन्द्र दाहालले कार्यक्रमको उदेश्य र औचित्यका बारेमा प्रष्ट पारेका थिए ।
कार्यक्रमको सहजीकरण रोजगार सेवा केन्द्र मेचीनगरकी प्रमुख कृपा रेग्मीले गरेकी थिइन् ।

मेचीनगरमा वैदेशिक रोजगारबाट फर्किएर आएका युवाहरु एक हजार १३७ जना रहेको बताइएको छ । उनीहरुलाई रेमीले विभिन्न कार्यक्रममा सहभागी गराएको छ ।

कार्यक्रमको समापन मेची उद्योग वाणिज्य संघका अध्यक्ष खेमराज प्रसाईले र सञ्चालन नेपाल उद्योग वाणिज्य महासंघ कोशी प्रदेशका कार्यक्रम संयोजक सञ्जिव पौडेलले गरेका थिए ।