मेचीनगर, ९ मंसिर । बिर्तामोडको बीएण्डसी मेडिकल कलेजले चिकित्सा शास्त्र अन्तर्गत एमबिबिएस (स्नातक तह) को पठन पाठनको तयारी गरेको छ ।
पहिलो वर्षमा ५० विद्यार्थीलाई अध्यापन गराउन कलेजले आवश्यक जनशक्ति, भौतिक पूर्वाधार र शैक्षिक सामग्रीको व्यवस्था गरिसकेको कलेजका जनसम्पर्क अधिकृत प्रमेश गिरीले बताए । उनका अनुसार विद्यार्थी भर्ना चलिरहेको छ ।
कलेजले मेचीनगर नगरपालिका–१२ स्थित धाइजनमा विद्यार्थीलाई पठन–पाठन गराउन पाँच तलाको ‘बेसिक साइन्स ब्लक’ भव्य भवन तयार गरेको छ ।
त्यस्तै ‘क्लिनिकल साइन्स’ अध्यापनका लागि बिर्तामोड नगरपालिका–५ स्थित बीएण्डसी हस्पिटलमा व्यवस्था मिलाइएको छ ।
‘एमबिबिएस पठन–पाठनका लागि तयारी अवस्थामा थियौँ,’ उनले भने, ‘धाइजनमा सुविधा सम्पन्न साइन्स ब्लक छ । अभ्यास गर्न विद्यार्थीले बीएण्डसी अस्पताल प्रयोग गर्न सक्ने छन् ।’
कलेजमा करिव १५० विद्यार्थीलाई सहज रूपमा पठन–पाठन गराउने व्यवस्था मिलाइएको छ । चिकित्सा शिक्षा आयोगले चालु शैक्षिकसत्रका लागि बीएण्डसीलाई ५० विद्यार्थी पढाउन पाउने सिट निर्धारण गरेको छ ।
सर्वोच्च अदालतले २०८० चैत १३ गते बीएण्डसी मेडिकल कलेजलाई सम्बन्धन दिन परमादेश जारी गरेको थियो । सोही परमादेशका आधारमा काठमाडौँ विश्वविद्यालयले सम्बन्धन प्रदान गरेको थियो ।
Discussion about this post