बानियाँ प्रतिष्ठानद्वारा पुरस्कृत व्यक्तित्वहरुको नाम घोषणा (भिडियोसहित)

मेचीनगर, १३ मंसिर । यसवर्ष पनि लाल भागिरथा बानियाँ प्रतिष्ठान मेचीनगरले उत्कृष्ट कृषक, उत्कृष्ट गृहिणी र राष्ट्रिय प्रतिभा पुरस्कारबाट तीनजना व्यक्तित्वहरुलाई पुरस्कृत गर्ने भएको छ ।

आज धुलाबारीमा आयोजित पत्रकार भेटघाटमा प्रतिष्ठानका अध्यक्ष हरिचरण बानियाँले उत्कृष्ट कृषक, उत्कृष्ट गृहिणी र राष्ट्रिय प्रतिभा पुरस्कारबाट पुरस्कृत हुनेको नाम सार्वजनिक गरेका हुन् ।

पुरस्कृत हुनेमा लाल भागिरथा उत्कृष्ट कृषक पुरस्कारबाट मेचीनगर–५ कि अनिताकुमारी कार्की, त्यस्तै लाल भागिरथा राष्ट्रिय प्रतिभा पुरस्कारबाट मेचीनगर–७ का देबेन्द्र खरेल र लाल भागिरथा उत्कृष्ट गृहिणी पुरस्कारबाट बुद्वशान्ति–५ कि रेणुका संग्रौला चापागाईं रहेका छन् । उनीहरूलाई जनही नगद ३१ हजार पुरस्कारसहित सम्मान गरिने अध्यक्ष बानियाँले जानकारी दिए ।

५७ वर्षीया उत्कृष्ट कृषक कार्की शिक्षण पेशाबाट निवृत जीवनलाई सदुपयोग गर्दे परम्परागत रुपमा हुँदै आएको निर्वाहमुखी करेसाबारी खेतीलाई व्यवसायिक कृषिमा रुपान्तरण गरेकी छन् ।

अग्र्यानिक तरकारी उत्पादनमा विशेष रुचि राख्ने उनले ५ कठ्ठा जग्गाको करेसाबारीमा ओडब्ल्युडीसी प्रविधिबाट जैविक मल प्रयोग गरेर दर्जनौँ प्रकारका तरकारी, फलफुल र अन्न खेती गरेकी छन् ।

त्यस्तै ५१ वर्षीय राष्ट्रिय प्रतिभा खरेल मेची चरा तथा बन्यजन्तु संरक्षण समाजका अध्यक्ष, वाइल्डलाइफ फोटोग्राफर, फोटो पत्रकार र सामाजिक अभियन्ता हुन् । उनले ३४० प्रकारका चराको खोज, ४७७ प्रकारका चराको तस्वीर खिचिसकेका छन् ।

उनले मेचीनगर–७ मा नेपालमानै पहिलो पटक हरित परेवा चरा फेला पारेका छन् । त्यस्तै खरेलले इलामको सूर्योदयन गरपालिकामा हङरायो दुर्लभ चरा समेत फेला पारिसकेका छन् ।

यसैगरी, ४३ वर्षीया उत्कृष्ट गृहिणी चापागाईं आफ्ना सन्तानको पालनपोषण गर्ने, ज्येष्ठ नागरिकको स्याहार, उपचार र संरक्षणमा सदैव काम गरिरहेकी छन् । वृद्व अवस्थाका दुवैजना क्यान्सर पीडित सासु र ससुराको नियमित उपचार, हेरचाह गरिरहेकी छन् । वुहारी भएर पनि छोरी सरह सासु–ससुराको स्याहारसुसारमा कमि हुन दिएकी छैनन् ।

प्रतिष्ठानले ८० वर्षमाथिका दुईजना दम्पत्तिलाई समेत नगदसहित सम्मान गर्ने भएको छ । मेचीनगर–११ का ८६ वर्षीय भिमप्रसाद चापागाई र ८८ वर्षीया विष्णुमाया चापागाई नगद एकहजार २ सयसहित सम्मान गरिने भएको छ ।

यही मंसिर २० गते मेचीनगर–११ स्थित लाल भागिरथा बानियाँ प्रतिष्ठानको छैठौं बार्षिकोत्सवमा तीन जनालाई पुरस्कार प्रदान गरिने भएको हो ।

बार्षिकोत्सवको प्रमुख अतिथिका रुपमा राष्ट्रिय योजना आयोगकी सदस्य एवम् दमक नगरपालिकाकी पूर्व उपमेयर गीता अधिकारी आउने भएकी छन् ।

पत्रकार भेटघाट कार्यक्रमको अध्यक्षता प्रतिष्ठानका अध्यक्ष हरिचरण बानियाँले र सञ्चालन सचिव डम्बर देउजाले गरेका थिए ।