झापा, २० पुस । आगामी माघ २२ गते २६ औँ स्थापना दिवसको अवसरमा प्रेस चौतारी नेपाल झापा जिल्ला कमिटीको १० औं जिल्ला अधिवेशन गर्ने निर्णय गरिएको छ ।
आज बिर्तामोड स्थित प्रेस चौतारीको कार्यालयमा बसेको बैठकले माघ २२ गते शिवसताक्षी नगरपालिका–१० को पर्यटकीय क्षेत्र दोमुखामा जिल्ला अधिवेशन गर्ने निर्णय गरिएको झापा अध्यक्ष मनकुमार गदालले जानकारी दिए ।
बैठकले अधिवेशन सम्पन्न गर्नका लागि विभिन्न उपसमितिहरु गठन गरेर जिम्मेवारी बाँडफाँड गरिएको छ । सदस्यता नविकरण, नयाँ सदस्यता प्रदान गर्ने लगायतका निर्णयहरु गरेको छ ।
सदस्यता नविकरण र नयाँ सदस्यता प्रदान गर्न संगठनका सचिव प्रकाश पौडेलको संयोजकत्वमा ५ सदस्यीय उपसमिति गठन गरिएको छ ।
सदस्यता नविकरणका लागि पुस २९ गते सम्मको समय तोकिएको छ । अध्यक्ष गदालको संयोजकत्वमा ९ सदस्यीय आर्थिक समिति गठन गरेको छ ।
यसैगरी पत्रकारिता पुरस्कार कोष र पत्रकार उपचार सहयोग कोषको कार्यविधि संशोधन गर्न संगठनका केन्द्रीय सदस्य तथा झापा जिल्ला इञ्चार्ज सन्तोष आचार्यको संयोजकत्वमा उपसमिति गठन गरेको छ ।
विं.सं.२०५५ सालमा स्थापना भएको संगठनले यसअघि रजतमहोत्सव मनाइसकेको छ । यस पटक २६ औं स्थापना दिवस भव्यरुपमा मनाउन विभिन्न उपसमितिहरु बनाइएको अध्यक्ष गदालले बताए ।
Discussion about this post