सिम्रिकको कानेपोखरीमा पाँच दिने श्रृंगार तालिम

झापा, २१ पुस । बिर्तामोड नगरपालिका–४ मा मुख्य कार्यालय रहेको सिम्रिक बचत तथा ऋण सहकारी संस्थाको आयोजनामा मोरङको कानेपोखरीमा आजदेखि पाँच दिने आधारभूत श्रृंगार तालिम सुरु भएको छ ।

शिक्षा उपसमितिको आयोजनामा मोरङ जिल्ला अन्तर्गतका सेवा केन्द्रहरुका शेयर सदस्यलाई लक्षित गरेर तालिम आयोजना गरिएको संस्थाका कार्यकारी प्रमुख कमलबहादुर बस्नेतले जानकारी दिए ।

संस्थामा आबद्ध महिला शेयर सदस्यलाई आत्मनिर्भर बनाउंदै उद्यममा जोड्न यस्ता किसिमका तालिम संस्थाले आयोजना गर्दै आइरहेको बस्नेतको भनाई छ ।

उनले पुँजी अभावकै कारण हातमा सिप भएर पनि व्यवसाय सञ्चालनमा समस्या भोग्दै आएका शेयर सदस्यलाई संस्थाले लगानी गर्ने बताए ।

तालिममा मोरङ जिल्ला सेवा केन्द्रहरुबाट ३४ जना महिला शेयर सदस्यहरु सहभागी रहेका छन् । सहभागीलाई जानुकादेवी प्रधान र हृदय कुमारी संग्रौलाले प्रशिक्षण दिइरहेका छन् ।

यसअघि पनि शिक्षा उपसमितिको आयोजनामा इलामको नेपालटारमा शेयर सदस्यहरुलाई श्रृंगार तालिम प्रदान गरिएको संस्थाका अध्यक्ष सुवास भट्टराईले बताए ।

त्यसैगरी खुदुनाबारीमा कपुरधुप बात्ती निर्माण तालिम सम्पन्न गरिसकिएको संस्थाका शिक्षा उपसमिति संयोजक मेहरमान बिष्टले बताए ।
शिक्षा उपसमितिका सदस्य बद्री प्याकुरेलले सञ्चालन गरेको कार्यक्रमको औचित्य माथि कार्यकारी प्रमुख बस्नेतले प्रकाश पारेका थिए ।

झापा, मोरङ, इलाम र पाँचथर गरी ४ जिल्ला कार्यक्षेत्र रहेको सिम्रिक साकोसको तीन अर्ब २१ करोड बढीको वासलात छ । ४६ वटा सेवा केन्द्रहरु मार्फत शेयर सदस्यहरुलाई सेवा सुविधा दिईरहेको संस्थाले जनाएको छ ।

वित्तिय कारोबारसँगै कृषि, शिक्षा, स्वास्थ्यसहित सामाजिक क्षेत्रमा काम गर्दै आएको संस्थाले जनाएको छ ।