चिया बगानका मजदुरहरुलाई क्षमता अभिवृद्धि

मेचीनगर, २ चैत । किसान आदिवासी उत्थान समिति मेचीनगर–९ ले चिया बगानमा कार्यरत आदिवासीहरूको क्षमता अभिवृद्धि गर्न आज र भोलि संगोष्ठी कार्यक्रम आयोजना गरेको छ ।

समितिले आज मेचीनगर–८ स्थित किराँत याक्थुङ चुम्लुङको भवनमा चिया बगानमा कार्यरत आदिवासीहरूको क्षमता अभिवृद्धि गर्न दुईदिने संगोष्ठी कार्यक्रम आयोजना गरेको हो ।

संगोष्ठीको मेचीनगर नगरपालिकाका प्रमुख गोपालचन्द्र बुढाथोकीले मादल बजाएर उद्घाटन गरेका थिए । नगरप्रमुख बुढाथोकीले आफ्नो संस्कृति र पहिचान जोगाउन गलत खानपानको जीवनशैली परिवर्तन गर्नु पर्नेमा जोड दिए ।

‘हजुरबुबादेखि नातिसम्म चिया बगानमा नै वित्छ’, बुढाथोकीले भने–‘चेतना अभिवृद्वि गर्नु पर्छ । सादरी भाषामा पर्ने सबै जातिहरु एक भएर कार्यक्रम लिएर आए त्यसका लागि नगरपालिकाले सहयोग गर्नेछ ।’

यहाँका किसान जातिहरु पहिला काँकरभिट्टा र धुलाबारीमा जग्गा नाप्नु पर्यो भने साङ्ला र भाटाले जग्गा नाप्ने गरेको इतिहास रहेको उनको भनाई छ । ती समुदायले गिट्टा, भ्याकुर र खरायो खोजेर जीवीका चलाउने गरेका थिए ।

कार्यक्रममा चिया कफी श्रमिक युनियन नेपालका अध्यक्ष सन्तकुमार राई, महासचिव विक्रम गिरी, युनियनका टोक्ला ईकाई संघका अध्यक्ष डम्बर खत्री लगायतले शुभकामना मन्तव्य व्यक्त गरेका थिए ।

संगोष्ठीमा मुण्डा, खडिया, उराउ, किसान, ग्वाल, कँवर, करुवा, सन्थाल, मालपाढे र रौँटीया लगायत जातिका ८० जना सहभागीलाई एशियाली आदिवासीहरुको एक्यबद्वता कोषका सदस्य वेचन उराउ र किरण बरामले प्रशिक्षण दिएका थिए । बराम नेपाल मानवअधिकार आयोगका शाखा अधिकृत समेत हुन् ।

सहभागीलाई आईएलओ १६९, राज्यले श्रमिकको उपचार, बीमा, विषादीको प्रयोग, उपकरण, न्युनतम ज्याला, नियुक्ति लगायतका विषयमा प्रशिक्षकद्वय उराउ र बरामले ध्यानाकर्षण गराएको किसान आदिवासी उत्थान समितिका उपाध्यक्ष भीम किसानले जानकारी दिए ।

संगोष्ठीको दोस्रो दिन सहभागीलाई फिल्डमा नै अध्ययन तथा अवलोकन गरिने उनले बताए । यही चैत १५ गते नगरपालिकाको सहयोगमा किसानको मौलिक संस्कृति तथा सर्वद्धनका लागि सचेतना कार्यक्रम गरिने उनले जानकारी दिए ।

किसान आदिवासी उत्थान समितिका अध्यक्ष चन्द्रकुमार किसानको अध्यक्षतामा सम्पन्न पहिलो दिनको संगोष्ठीको औचित्यमाथि नेपाल ट्रेड युनियन महासंघ (जिफन्ड)का कोशी प्रदेश सदस्य सीता राईको प्रकाश पारेकी थिइन् ।

संगोष्ठी कार्यक्रमको सञ्चालन किसान आदिवासी उत्थान समितिकी सदस्य सरिता किसानले गरेकी थिइन् ।