मेचीनगर, १७ चैत । बाहुनडाँगी सिद्धिखोला एकीकृत खानेपानी उपभोक्ता तथा सरसफाइ संस्थाको अध्यक्षमा हेमलाल गुरागाई निर्वाचित भएका छन् ।
उनी काँग्रेसबाट संयुक्त लोकतान्त्रिक प्यानलका अध्यक्षका उम्मेदवार बनेका थिए ।
नेपाली काँग्रेस, राष्ट्रिय प्रजातन्त्र पार्टी र संघीय लिम्बुवान लोकतान्त्रिक मोर्चाको संयुक्त लोकतान्त्रिक प्यानलबाट एकजना महिला सदस्य बाहेक सबै निर्वाचित भएका छन् ।
गुरागाईले ४३२ मत ल्याएर विजयी भएका हुन् । उनका प्रतिस्पर्धी प्रगतिशील समूहतर्फका अध्यक्ष पदका उम्मेदवार पासाङ तामाङले ३१५ मत मात्र प्राप्त गरेका थिए । उनी नेकपा एमालेका तर्फबाट अध्यक्षका उम्मेदवार बनेका थिए ।
त्यस्तै नेकपा माओवादी केन्द्रका तर्फका अध्यषका उम्मेदवार मेघराज खड्काले १८५ मत मात्र ल्याए । खड्का स्वतन्त्र उम्मेद्वारका रुपमा थिए ।
उपाध्यक्षमा सागर कार्की विजयी भए । संयुक्त लोकतान्त्रिक प्यानलका कार्कीले ५८२ र प्रगतिशील समूहतर्फका पुष्कर घिमिरेले २२५ मत ल्याएका थिए ।
सचिवमा संयुक्त लोकतान्त्रिक प्यानलका उम्मेदवार सन्तोष सुवेदी ३५५ मत ल्याएर विजयी भए । उनका प्रतिस्पर्धी स्वतन्त्र उम्मेदवार राजन कार्कीले ३२५ मत मात्र ल्याए । सुवेदी राप्रपाबाट हुन् ।
प्रगतिशील समूहतर्फका सचिव पदका उम्मेद्वार गोपाल बराईलीले १५३ मतमा चित्त बुझाउनु पर्यो । सहसचिव पदमा राजन न्यौपाने ३९४ मतका साथ विजयी भए । उनका प्रतिस्पर्धी प्रगतिशील समूहका सुरेश घिमिरेले २८८ मत प्राप्त गरेका थिए । न्यौपाने पनि राप्रपाबाट हुन् ।
यस्तै कोषाध्यक्षमा संयुक्त लोकतान्त्रिक प्यानलकी पूर्णिमा कट्टेल विजयी भइन् । उनले ३९४ मत ल्याइन भने प्रगतिशील समूहकी पुष्पाकुमारी बिष्टले २४४ मत मात्र ल्याइन् ।
यसैगरी खुला महिला सदस्यमा संयुक्त लोकतान्त्रिक प्यानल राधा नेपालले ४९२ र उमा राउत ३३७ मत ल्याएर विजयी बनेका थिए । राउत प्रगतिशील समूह तर्फबाट उम्मेदवार थिइन् ।
महिला सदस्यमा बिनु लिम्बुले २९२, भगवती राईले १८४, पुरुषतर्फ खुला सदस्यमा युवराज पौडेल ३२९, चन्द्रलाल ढुंगाना ३०५ मतका साथ विजयी बने ।
खुला पुरुष डम्बरबहादुर लिम्बु मगरले १९९, रामकुमार दाहालले १२१, किशोरकुमार दुलालले १२१ र देउकुमार लिम्बुले २६० मत मात्र प्राप्त गरे । संघीय लिम्बुवान लोकतान्त्रिक मोर्चाका महिला सदस्य पराजित भइन् ।
कुल १३२७ मतदाता रहेको समितिमा १००९ मत खसेको निर्वाचन समिति संयोजक चन्द्रशेखर गुरागाईले बताए । ९ पदका लागि २३ जना चुनावी मैदानमा थिए । शनिवार सम्पन्न निर्वाचनको अन्तिम मत परिणाम आइतबार विहान ३ बजे घोषणा भएको थियो ।
Discussion about this post