रास्वपाको मेचीनगर अधिवेशन, सभापतिमा सन्तोष

मेचीनगर, २९ बैशाख । राष्ट्रिय स्वतन्त्र पार्टी (रास्वपा) मेचीनगरको सभापतिमा सन्तोष राजवंशी सर्व सम्मत चयन भएका छन् ।

सोमबार काँकरभिट्टामा सम्पन्न रास्वपाको प्रथम नगर अधिवेशनले राजबंशीको नेतृत्वमा १५ सदस्यीय नयाँ कार्य समिति सर्वसम्मत चयन गरेको हो ।

राजवंशी यसअघि नगर उपसभापतिको जिम्मेवारीमा थिए । उनी धुलाबारी निवासी हुन् ।

अधिवेशनले उपसभापतिमा पुरुषोत्तम काफ्ले, सचिवमा शिशिर पोखरेल, सहसचिवमा गोकुल अधिकारी चयन भएका छन् ।

यसैगरी सदस्यहरुमा काजीमान विश्वकर्मा, सुधादेवी खड्का, सुशीला काफ्ले, मैया उप्रेती कट्टेल, दिलबहादुर गजमेर, महेन्द्र चौधरी, गोपाल बुढाथोकी, निर्मला सुवेदी, हस्तबहादुर खड्का (विमल) रहेका छन् । बाँकी २ जना सदस्य पहिलो बैठकले मनोनित गर्ने जनाएको छ ।

यस्तै, अधिवेशनले झापा क्षेत्र नं.१ को क्षेत्रीय सभापतिमा असिम दाहाललाई सर्वसम्मत चयन गरेको छ । नगर अधिवेशनका प्रमुख अतिथि पार्टीका कार्यवाहक सभापति डीपी अर्यालले घण्टी बजाएर उद्घाटन गरेका थिए ।

कार्यक्रममा पार्टीका कार्यवाहक सभापति अर्याल, सहप्रवक्ता रमेश प्रसाई, केन्द्रीय सदस्य एवम् संघिय सांसद तोसीमा कार्की, केन्द्रीय सदस्य ज्वाला संग्रौला, केन्द्रीय संगठन विभाग सदस्य होमनाथ भण्डारी, कोशी प्रदेश महामन्त्री लालबिक्रम थापा, जिल्लाका कार्यवहाक सभापति प्रकाश पाठक, सहसचिव भीम कुँवर लगायतले शुभकामना मन्तव्य व्यक्त गरेका थिए ।

रास्वपा मेचीनगरका सभापति कमल गौतमको अध्यक्षतामा सम्पन्न कार्यक्रमको सञ्चालन कोशी प्रदेश शिक्षा विभाग प्रमुख प्रेमराज घिमिरेले गरेका थिए ।

प्रतिनिधि छनाेट स्थगित 

यसैबिच अधिवेशनले केन्द्रीय प्रतिनिधि छनाेटमा पार्टीका निवर्तमान झापा सभापति उमेश खरेलकाे नाम आएपछि विराेध भएको थियाे ।

खरेलकाे नाममा विराेध भएपछि प्रतिनिधि छनाेट प्रक्रिया स्थगित गरिएको जिल्ला सहसचिव भीम कुँवरले  बताए ।