मेचीनगर, ३० बैशाख । निलसरी च्यालेन्ज कपको उपाधि रेडहर्ष इलामले जितेको छ ।
मंगलबारकाे फाइनल खेलमा आयोजक युथ जोरसिमललाई पेनाल्टी सुटआउटमा हराउँदै रेडहर्ष इलामले उपाधि जितेको हो ।
निर्धारित समयमा दुवै टिमले २-२ गाेलले बराबरी भए पछि खेलको निर्णय टाइब्रेकरबाट लिइएको थियो ।
पेनाल्टी सुटआउटमा रेडहर्ष इलामले आयोजकलाई ३-२ गोल अन्तरले पराजित गरेको थियो ।
आयोजकका राज क्षेत्री, अविनाश चौधरीले गोल गरेका थिए । अरुन मेचेको प्रहार गाेलरक्षक निश्चल दनुवारले बचाए भने प्रदिप श्रेष्ठ, पुजन श्रेष्ठको प्रहार बाहिरिएको थियो ।
रेडहर्षका म्यागनेट लिम्बू, सविन मगर र साङ्गे शेर्पाले गोल गरे भने रोमन योगी, विवेक सुनामको प्रहार बाहिरियो ।
आयोजक झापा एफसीलाई पराजित गर्दै फाइनल प्रवेश गरेको थियो । रेडहर्स एफसी इलाम बेलबारी एफसीलाई पराजित गर्दै फाइनल प्रवेश गरेको थियो ।
खेलको २१ औँ मिनेटमा रेडहर्षका साङ्गे शेर्पाले गोल गर्दै टिमलाई अग्रता दिलाएका थिए । आयोजकको डिफेन्सको गल्तीको फाइदा उठाउँदै साङ्गे शेर्पाले उत्कृष्ट गोल गरेका थिए ।
आयोजकका लागि रोहित सुब्बाले बराबरी गोल फर्काएका थिए । अरुन मेचेको क्रस पासलाई सदुपयोग गर्दै हेडमार्फत रोहित सुब्बाले जाली चुमाए ।
निशान मुर्मुले इञ्जुरी समयमा गोल गर्दै टिमलाई २-१ काे स्थितिमा पुर्याएका थिए । डिबक्स नजिकैबाट निशानले गरेको प्रहारलाई विपक्षी गोलरक्षक निकेश पाण्डेले बचाउन सकेनन् ।
पहिलो हाफ २-१ ले अगाडि आयोजकलाई खेलको अन्तिम समयमा रेडहर्षका साङ्गे शेर्पाले गोल गर्दै खेल बराबरी बनाएका थिए ।
प्रतियोगिताको विजेता रेडहर्ष इलामले २ लाख र उपविजेता आयोजकले १ लाख नगदसहित ट्रफी प्राप्त गरेकाे थियाे ।
खेलको म्यान अफ द म्याच रेडहर्ष इलामका साङ्गे शेर्पा घोषित भए । उनले नगद २५ सयसहित ट्रफी प्राप्त गरे ।
प्रतियोगिताको बेष्ट गोलरक्षक आयोजकका विपिन चौधरी, प्लेयर अफ द सिरिज र इमर्जिङ प्लेयर अरुन मेचे, बेष्ट मिडफिल्डर निशान मुर्मु, बेष्ट कोच डिकबहादुर धिमाल, हाइ स्कोरर उर्लाबारी एफसीका आशिष चापागाई, बेष्ट डिफेन्स इलामका विवेक सुनाम, बेष्ट स्ट्राइकर दिपेश राई घोषित भए । उनीहरुले नगद ५ हजारसहित ट्रफी प्राप्त गरे ।
संविधानसभा सदस्य रविन कोइरालाको प्रमुख आतिथ्यता सम्पन्न भएको कार्यक्रममा मेचीनगर-१० का वडाध्यक्ष नारायण खनाल, ७ का प्रलादमणि ओली, झापा जिल्ला फुटबल संघका महासचिव शेरबहादुर बस्नेत, दुर्गेश्वरी कृषि सहकारी संस्थाका अध्यक्ष सन्तोष मेचे लगायतको आतिथ्यता रहेको थियो ।
अध्यक्ष सुन्दर मेचेको अध्यक्षतामा सम्पन्न कार्यक्रमको सञ्चालन सचिव सञ्जय मेचेले गरेका थिए ।
Discussion about this post