नयाँ मौद्रिक नीति व्यवसायीको हितमा आउँछ : उपाध्यक्ष ढकाल

मेचीनगर, १० जेठ । नेपाल उद्योग बाणिज्य महासंघका उपाध्यक्ष हेमराज ढकालले भर्खरै नियुक्त भएका गभर्नरले नयाँ मौद्रिक नीति व्यवसायीको हितमा ल्याउने दावी गरेका छन् ।

आज धुलाबारी स्थित नाङ्लो रेष्टुरेन्टको सभाहलमा आयोजना गरिएको नेपाल छुर्पी व्यवसायी संघको प्रथम बार्षिक साधारण सभाको उद्घाटन गर्दै प्रमुख अतिथि ढकालले यस्तो कुरा बताएका हुन् ।

नयाँ नियुक्त गभर्नर प्रा.डा.विश्वनाथ पौडेलले अब ल्याउन लागिएको नयाँ मौद्रिक नीतिले व्यवसायीलाई राहत पुग्ने गरिको आउने आश्वासन पाएको उनको भनाई छ ।

निजी क्षेत्रलाई बलियो बनाउन सरकारले नीतिमा सुधार गरे देशको अर्थतन्त्र सुध्रिनेमा ढुक्क हुनु पर्ने अवस्था आउने ढकालको दावी छ ।

कार्यक्रममा नेपाल उद्योग बाणिज्य महासंघ कोशी प्रदेशका अध्यक्ष राजेन्द्र राउत, केन्द्रीय सदस्यहरु नरेन्द्रकुमार खड्का, उमेश डालमिया, गोकुल श्रेष्ठ, किवी संघ नेपालका अध्यक्ष सीपी कडरिया, झापा उद्योग संघका अध्यक्ष यामबहादुर श्रेष्ठ लगायतले राज्यले उद्योगी– व्यवसायीको सुरक्षा र संरक्षण गर्नु पर्नेमा जोड दिएका थिए ।

कार्यक्रममा नेपाल उद्योग बाणिज्य महासंघ, मेची उद्योग बाणिज्य, दमक उद्योग बाणिज्य, यार्सा, किवी, छुर्पी, प्लाईउड, भेनियर, महासंघका वस्तुगत संघ–संस्थाका अध्यक्ष, प्रतिनिधि र उद्यागी व्यवसायीहरुको बाक्लो उपस्थिति रहेको थियो ।

नेपाल छुर्पी व्यवसायी संघका अध्यक्ष रेशमबहादुर पोखरेलले दुधबाट बनाइएका डगच्यु, छुर्पी र कच्चा पदार्थका विषयमा विदेशमा निर्यात हुने वस्तुमा राज्य र भारत सरकारले व्यवसायीलाई सहज गरिदिन अनुरोध समेत गरेका थिए ।

नेपाल उद्योग बाणिज्य महासंघको आगामी चैत महिनामा हुने चुनावका लागि माहोल बनाउन पनि व्यवसायीका केन्द्रीय तहका नेताहरुको जमघट बाक्लिन थालेको छ । त्यस्तो छनक छुर्पीको साधारण सभामा पनि देखिएको छ ।

नेपाल छुर्पी व्यवसायी संघका अध्यक्ष रेशमबहादुर पोखरेलले अध्यक्षतामा सम्पन्न कार्यक्रमको धन्यवाद उपाध्यक्ष नरेशलाल श्रेष्ठले र सञ्चालन मेची उद्योग बाणिज्य संघका कार्यकारी अधिकृत गोपाल वस्नतले गरेका थिए ।